Escríbolo como se escribía enantes, cuando yo lu conocí. La verdá ye que la grafía del euskera será la que seya, pero nun m’avezo a escribir eso de «Txetxu», como tampoco nun m’avezo (anque tenga que facelo) con determinaes grafíes del asturianu, y que nun s’enteren los mios compañeros d’Academia. Nel cursu 1964-65, acabada de recien la carrera de Profesor Mercantil na Escuela Comercio de Xixón, fuimos dalgunos de los titulaos a estudiar a Bilbao Ciencies Económiques. Ellí tuvimos tres años que nos llevaben esos estudios por mor de les convalidaciones que nos concedíen los nuestros estudios comerciales. Yo nun acabé, por otros motivos que tampoco vienen al casu, pero esos años bilbainos cambiaron y decidieron el mio futuru personal. Pero bueno, a lo que diba. Dalgunos de los que ellí fuimos, y que nos axuntamos nun pisu conocíu na Facultá de Sarrico como «el pisu de los asturianos», yéremos mui futboleros, y del Sporting, claro. Asina que siempre que podíemos y que los escasos recursos nos lo permitíen, díbemos al vieyu San Mamés a ver los partíos del Athletic y, los domingos pela mañana, a la Seleición Xuvenil Vasca que xugaba’l Campeonatu de Seleiciones Autonómiques. Tenién un gran equipu, anque nun me suena que nunca ganaren el títulu. Yera una maraviya sobre too ver xugar a aquella delantera que formaben: Arraiz, Estéfano, Lavín, Rojo y Ezpeleta. Los cuatro últimos pertenecíen al Athletic de Bilbao y Arraiz, un estremu derechu fuerte y de gran tiru, yera creo que del Baracaldo. El meyor yera Estéfano. Un chaval piquiñín que veía mui bien el fútbol y tenía «un guante» nel pie derechu. Un gran pasador. Paezme que llegó a debutar nel equipu de los mayores pero non trunfó. Yera demasiao menudu, faltába-y cuerpu anque-y sobraba calidá. Recordábame muncho a Koldo Aguirre, otru gran xugador que, amás, xugaba nel mesmu puestu y fue internacional unes cuantes veces. El delanteru centru Lavín, tamién llegó a xugar colos mayores y anque metía goles y yera mui rápidu, tampoco nun tenía cuerpu pa trunfar dientro l’estilu que tenía daquella l’equipu vascu. Ezpeleta, por contra, tenía mui bon toque de balón pero yera bastante «atecháu», que dicimos n’Asturies. Medrosu, cagalón, anque munchos centros suyos finaben en gol. Y tou esti rollu pa llegar a Chechu Rojo. Xugaba d’interior izquierdu y tenía mui bones maneres. Gran zancada, bon regate, velocidá y toque de balón. Yera mui «elegante». Ésti sí trunfó nel Athletic, pero tuvo que desplazase al estremu porque nel so puestu tenía muncha y bona competencia. Seguí la so carrera porque práuticamente vilu ñacer como futbolista, y siempre me prestaron los sos ascensos y el so afitamientu nel club y tamién na Seleición Española.
Agora entérome del so fallecimientu y viénenme a la memoria toos esos recuerdos de cuando yera mozu (él y yo) y préstame recoyelo nesti blogue, anque seguro que nun tendrá mayor interés pa los qu’avecen a lleer coses de más sustancia. Pido perdón, si asina ye. Ye lo que tenemos la xente mayor, siempre cuntando batallines.
