La familia de Javier Fernández cansóse d’aguantar. Lleva yá munchos años de que, cuando les coses pinten mal deportivamente, tener que sentir a los que, eufimísticamente, se llamen «la grada», llevantar les pancartes glayando «¡Fernández vete yá!» y coses muncho peores. A so padre pasó-y lo mesmo. Y seguramente sedrá verdá que nin un nin otru llograron afitar al Sporting en Primera División, onde por Historia mercería tar, pero esi ye un tema que, a la llarga, namás consiguen los equipos con munches perres. Nun ye’l nuestru casu porque Asturies ye un País probe y equí nun sobren perres pa invertir en deporte, y si non mírense tamién otros equipos que, namás con un gran esfuerciu, sobresalen n’especialidaes como Balonmano femenín o Hockey sobre patines, y dacuando tienen qu’arrenunciar a finxos más altos porque nun hai quién los patrocine. Asina y too, l’equipu tuvo bones temporaes y ascensos a Primera -Preciado, Abelardo…- en cuyu momentu naide s’alcordó muncho de los Fernández, porque naide tira piedres enriba’l so teyáu. Pero nun fue sólo’l Sporting, otros munchos equipos de presupuestos al empar que los nuestros pasaron pol mesmu calvariu de xubíes y baxaes: Alavés, Valladolid, Español, Elche, Las Palmas… esceuto casos como’l Villareal onde hai un ricu empresariáu que curia a lo suyo. Más sangrantes son casos como’l del Depor que, en cuantes s’acabaron les perres, arrastriase por categoríes impropies de la so Historia, o los nuestros vecinos asturianos que tampoco nun son a llograr el caru ascensu a la categoría de los más grandes.
¿Quier esto dicir que los Fernández nun tuvieron dala culpa en tou esti xube y baxa del equipu? Ye nidio que non. Seguro qu’otros dirixentes lo ficieren meyor. En tou casu prestaríame que los críticos dixeren qué dirixentes fueron esos, incluyíos los d’equipos como’l Barcelona, cuasi en bancarrota y con temporaes como ésta en que nun ganaron nin el Torneu los Barrios. Al mio modestu talantar el mayor fallu de los nuestros dirixentes fue’l nun saber arrodiase de xente competente y confiar nuna serie de «cantamañanes» que, o non supieron o s’aprovecharon de la so propia inorancia n’asuntos futbolísticos. Mala planificación, malos fichaxes, malos «ojeadores»… ficieron que’l nuestru equipu llegara esti añu a ser un de los peores de la so llarga historia, anque yo que tengo bona memoria recuerdo, porque vi esa temporada n’El Molinón, cuando estuvo matemáticamente en Tercera y salvóse con aquella repesca que se xugó en Palma de Mallorca. Cuando Ortiz, el capitán, tuvo «la cara» de sacar «cruz» naquella moneda al aire que nos llibró del descensu. Pero esa ye otra historia.
Agora, fartucos d’aguantar crítiques y pancartes, los Fernández (o seya, Javier) tán a piques d’aceutar la ufierta d’un grupu financieru mexicanu pa vender l’equipu de la nuestra ciudá. O seya, perder la identidá de siguir siendo un equipu asturianu. Meyor o peor, pero d’equí. Con capital de la tierra. Otra cosa más que marcha del País por falta perres. Porque durante tou esti tiempu non hubo nengún intentu seriu, repito, seriu, de compra-yos a los Fernández les aiciones que tienen y que los convierten en másimos acicionistes d’una sociedá anónima. Hubo un grupu d’hosteleros, dalgún afincáu en Madrid, que sacaron pechu diciendo que diben garralo ellos, pero paez ser que lo que queríen yera que-yos regalaren les aiciones. ¡Coño, que vayan a pidi-yles a Botín, a ver si-yos les da! Nada serio. Y ye que, nel fondu, cuando por Llei, los Clubes Deportivos tuvieron que se convertir en Sociedaes Anónimes, naide salvo cuatro gatos compraron les aiciones necesaries pa que l’equipu nun descendiere a Tercera División. Y tuvo qu’andar Tini Areces detrás de los empresarios, sobre too los de la construición, pa que metieren perres pa salvar al Sporting. Pepín Fernández fue un de los que dio’l pasu alantre, y lo mesmo asocedió cuando hubo, años depués, una ampliación de capital na que volvió a meter perres. Otros que pudieron nun lo ficieron, y agora quieren que-yos regale les aiciones y que marche. Eso ye nun entender pa nada de qué va too esto.
En fin, que la xente cansó de los Fernández, pero los Fernández tamién cansaron de la xente, y agora van vender eses aiciones que naide quixo, masque regalaes, a un grupu financieru mexicanu. Yá tienen les peñes lo que queríen. Entren a dirixir el Sporting unes persones que nun tienen nin la Historia, nin el conocimientu, nin la identidá, nin el sentimientu de lo que ye ser sportinguista. Agora van quedar tranquilos. Lo único, que si quieren volver a sacar les pancartes van tener que llevales hasta Jalisco.
Nota final.- Acabo lleer lo que pon la páxina de Wikipedia na entrada que correspuende a Javier Fernández y paez escrita por un «Ultra-sur» o «Ultra-boy» o como coño se llamen. Nunca vi nada menos oxetivo y más faltón que la dicha páxina d’autor desconocíu.
