Agora que’l Partíu Popular acaba de refugar, otra vez, la petición de la oposición de rebaxar l’IVA cultural, que xubieron hasta’l 21%, al antiguu 8%, quiciás ye’l momentu de ver esti illustrativu vidiu. Sabemos que la música tien un pergrande poder d’emotividá y ye capaz de crear un ambiente favoratible a determinaos valores. Un exemplu ye esti emocionante y reivindicativu momentu, que se vivió na Ópera de Roma cola representación del «Nabucco» de Verdi. Yera’l 12 de marzu de 2011 y festexábase’l 150 aniversariu de la creación de la moderna Italia. Presidía l’actu Silvio Berlusconi, d’aquella Primer Ministru. Intervieno, enantes de la representación, l’alcalde de Roma, Gianni Alemanno que, anque miembru del partíu gobernante, criticó grandemente los recortes en materia de cultura que taba faciendo’l gobiernu. Nun ambiente de fondu respetu y silenciu, la orquesta y el coru, dirixíos pol maestru Riccardo Muti, premiu Príncipe d’Asturies de les Artes, interpretaron el famosu «Va pensiero», una especie d’himnu a la llibertá que canten los esclavos xudíos, presos en en Babilonia. La tensión percorrió’l teatru cuando se cantaba: «Oh, mia patria, si bella y perduta…». Inmediatamente la xente pidió un bis a los gritos de «¡Viva Italia!» y «¡Llarga vida a Italia!». Muti, al que nun-y presta facer «bises», accedió pero dixo lo siguiente amirando pa Berlusconi y pal públicu: «Sí, llarga vida a Italia, pero yo yá nun tengo 30 años, viví tola mio vida como italianu y tengo percorríu munchu mundu. Güei siento vergoña de lo que pasa nel mio país. Aceuto, pues, a la vuestra petición d’un «bis» del «Va pensiero». Nun ye sólo pol sentimientu patrióticu que siento, sinón porque esta nueche, cuando dirixía al coru que cantó: «Ai, el mio país, bellu y perdíu…», pensé que si siguimos asina, vamos matar la cultura enriba la cuál se construyó la Historia d’Italia. En tal casu, la nuestra patria taría daveres «bella y perdida». Interrumpíu polos aplausos del públicu y de la propia orquesta y coru, Muti siguió: «Yo tuvi munchos años calláu. Agora, deberíemos da-y un sentíu a esti cantu. Propóngo-yos que se xunan al coru y que cantemos toos el «Va pensiero». Tola Ópera de Roma se llevantó y tamién la orquesta. Fue un momentu máxicu, porque nun fue sólo una representación de Nabucco, sinón una llamada d’atención a los políticos per parte del teatru de la capital. Esi momentu máxicu ye’l que podemos ver nel vidiu que va darréu. Paga la pena sentilo alto y claro. Dedíco-ylu al Sr. Rajoy.
http://www.youtube.com/embed/G_gmtO6JnRs
