Falaba esti día del homenaxe al lider sindical asturianu Severino Arias y comentaba qu’hai munches anéudotes que lu definen. Ésta que recueyo güei mándamela Humberto Vallina, amigu y tamién militante de l’antigua USO, y anque nun ye de les más definitories (na comida cuntáronse dalgunes cola policía, de munchu méritu) préstame ponela porque tamién espeya’l calter que tien.
Yera nos primeros años de la democracia y venía a dar una conferencia al Atenéu Xovellanos de Xixón Laureano López Rodó, antiguu ministru franquista, y responsable del llamáu «Plan de Desarrollo» y como diz Humberto Vallina, «un de los siete magníficos de Fraga». La conferencia nun tien importancia, enllena de llugares comunes y d’ emponderar el so llabor como ministru y tolo bono que fizo pola economía española. Yá nel coloquiu, un de los asistentes entrugó: “Cuando se formó la Mesa de Edad del Congreso después de las primeras elecciones democráticas Vd estuvo sentado al lado de “La Pasionaria”, ¿qué sintió entonces?”. Y López Rodó contestó: “Se me revolvieron las tripas”.
Darréu pide la pallabra Severino y, cuando-y toca, diz con esa calma tan suya: “A Vd se le revolvieron las tripas por estar sentado unos minutos al lado de una figura histórica que fue elegida por unos ciudadanos para que los representara. Entonces, ¿qué se nos tenía que haber revuelto a nosotros que tuvimos que soportarles 40 años sin que nadie les hubiese elegido para nada?»
Lo que digo, xeniu y figura.
