La famosa crisis económica na que’l mundu ta inxertu, nun dexa de ufiertar nuevos casos escandalosos cada día, que nos faen pensar que nun se trata sólo d’una crisis cíclica, anque abondo mayor de les que ya tamos avezaos a pasar, sinón que se trata d’una verdadera resquiebra del propiu sistema. L’últimu escándalu (por agora) que se produxo por aciu de l’aseguradora americana AIG, que recibió axudes multimillonaries pa evitar la quiebra y, al tiempu, repartió 165 millones de dólares en conceutu de primes ente los sos executivos, ye un exemplu más que pon en custión les mesmes bases del sistema capitalista que nun paez capaz nin siquiera d’organizar los sos propios circuitos financieros y comerciales.
El sacrosantu mercáu llibre, xunto a la coldicia, cada vuelta mayor, d’empresarios y executivos de grandes empreses ensin escrúpulos, ta provocando una distorsión tan pergrande de la economía, un caos tan xeneralizáu, que toos aquellos vaticinios de don Carlos Marx sobre’l final del capitalismu, que siempre causaron muncha risa polo equivocaos qu’aparentaben tar, tán principiando a cumplise.
Trátase, agora, d’intentar poner remiendos nun pantalón rotu pol qu’anicien a salir les vergoñes. Y fálase d’una nueva ética pa la empresa, y d’un nuevu intervencionismu de los poderes públicos na economía. Claro qu’esto namás durará hasta que se puea superar la situación y llegue, depués d’una sangría financiera que tamos pagando, con munchu esfuerciu, tolos contribuyentes, otra dómina de «vaques gordes» nes que se volverá a refugar la intervención del estáu pa que, los mesmos, tornen a tener les manes y los bolsos llibres.
En cualquier casu, y por si daquién de bona voluntá piensa que, polo menos sedría menester poner unos finxos mínimos pa que les empreses tuvieren dalgo más d’ética, de bon facer, dientro d’esti mundu capitalista, ehí van unes idees que m’abulten indispensables pa qu’asina fuere:
1) Cara al interior: Que seya une empresa que nun discrimine. Que nun discrimine ente’l trabayu de homes y muyeres. Que tenga, dientro de les sos posibilidaes, dellos puestos pa xente con dalguna discapacidá. Que reinvierta parte de les plusvalíes (beneficios) ente los trabayaores.
2) Cara a los consumidores: Que fabrique bonos productos. Que nun nos engañe o envenene. Que ponga unos precios xustos, con unos márxenes razonables de beneficiu pa cubrir el riesgu empresarial.
3) Cara al Mediu-Ambiente: Que seya respetuosu col Mediu-Ambiente. Que nun contamine. Que utilice tolos filtros necesarios y los medios al so algame pa reciclar los subproductos.
4) Cara a la Sociedá: Que, dientro de les sos posibilidaes, ‘emplegue parte de los beneficios pa fines sociales. Bill Gates ye multimillonariu, pero acaba fundar una ONG de llucha escontra la malaria que ta salvando miles de vides humanes.
Bien, too esto nun son más qu’unos apuntes a esnala-pluma que se m’ocurren sobre la marcha. Seguro qu’habrá otros requisitos o dalgún d’estos pudiere matizase. Lo que si ta claro ye qu’aportamos a un puntu de «nun retornu» nel panorama económicu mundial y, o se plantexen les coses d’otra miente, o esti caos nel que tamos sapozaos acabará, como un furacu prietu, absorviéndonos a toos.
(Contactu: amtrancho@telecable.es)
