Cellebróse esti pasáu miércoles nel Teatru Xovellanos de Xixón la «Gala Llírica» de Navidá, entamada pola Sociedá Filarmónica de Xixón. Esti añu, amás, yera a porgüeyu de l’Asociación Síndrome de Down Asturies, una asociación benemérita que llucha por dar a conocer a un coleutivu que, anque cada vuelta ye más reconocíu, entovía tien munchu camín que percorrer pa llograr una mínima igualdá de drechos económicos y sociales, principiando pol mercáu llaboral. Pero bueno, nun ye ésti’l momentu nin quiciás el llugar pa falar d’ello, anque dalgún día habría que lo facer.
El conciertu tuvo dos partes bien estremaes. La primera dedicada al repertoriu llíricu italianu, que vien de ser reconocíu como patrimoniu cultural inmaterial de la Unesco, y una segunda con exemplos de la música llírica española… y asturiana. Na cabecera d’esti pequeñu comentariu apuntábemos que’l conciertu tenía delles pingarates asturianes, pero en realidá son dalgo más que pingarates.
D’empiezu los tres intérpretes son asturianos. La espléndida soprano Beatriz Díaz ye allerana, el tenor Jorge Rodríguez-Norton avilesín y el pianista que los acompangaba, Marcos Suárez, ye llangreanu. Ellos formaron un potente tríu que fizo les delicies de los qu’ellí tuvimos.
Na primera parte, con obres de Verdi, Puccini, Tosti, Gastaldon y Di Capua (el «O sole mio») destacó, al mio modestu xuiciu, el «Vissi d’arte», de Tosca, na que Beatriz Díaz cantó con potencia y emoción la desventura d’aquella muyer que descubre que’l so amante ta siendo torturáu pol mayor tiranu de Roma y sólo puede salvalu entregándose a él. En cambiu, y que me perdonen los puristes, nun me dio muncho más pola romanza de Verdi «In solitaria stanza», lloñe de la so grandiosa música operística.
Na segunda parte vieno la otra contribución asturiana al conciertu, con dos obres de Luis Vázquez del Fresno. Primero la canción «De noche», de les «Siete canciones asturianes», y depués «El xuguete» de «Cantarinos pa que suañes». Na primera Rodríguez-Norton tuvo mui bien con una especie de tonada llírica de dificil execución. Y na segunda Beatriz Díaz cantó con dulzura un poema n’asturianu de José María González – «Chemag», musicáu pol maestru Vázquez del Fresno. Siguieron, llueu, delles obres de Moreno Torroba, Chapí, Guerrero y Penella, destacando’l guapísimu dúu «Cállate corazón…», de «Luisa Fernanda», na que dambos intérpretes amosaron la so gran calidá y compenetración. Hubo química ente ellos a lo llargo tola representación. Y, yá pa finar, una sorpresa fuera programa, a mou de «propina», en forma d’un «amiestu» de villancicos: «Noel», «Navidades blancas», «El tamborilero», «Adeste fideles» y a la fin el «Noche de paz» col que finó’l conciertu. Too ello mui prestoso y qu’amuesa la importancia que tien Asturies dientro’l panorama llíricu español. Habría que lo ruxir un poco más por parte los responsables culturales del País, y repetir actuaciones como ésta pa conocimientu del públicu en xeneral. Pero, bueno, yá sé qu’esto ye como «dar voces en castañéu». Nunca meyor dicho.
