Veo nel Telediariu los efeutos devastadores que’l ciclón Matthew dexa al so pasu. Una de les zones más castigaes ye la República Dominicana, cola qu’agora tengo munchos llazos afeutivos gracies a l’asociación «Lleva un libro en la maleta», de Virgina Read Escobal, pente medies de la cuál pude mandar unes cuantes caxes de llibros míos pa los neños y neñes d’ellí. Al rodiu d’ello, cuntóme l’otru día l’amiga María Rosa Serdio una guapa historia que vos tresllado. Santo Domingo ye una ciudá de pergrandes contrastes. La estaya de xunto al mar, ta enllena de grandes cases y chalets de famosos, actores, cantantes, potentaos en xeneral. Mentanto la estaya de la montaña ta enllena de chaboles o casines de mala muerte onde los habitantes carecen de lo más imprescindible. Los que mas lo sufren, como siempre, los neños. Munchos d’ellos anden descalzos o con unes alpargatines que se funden na repla en cuantes llueve un poco y se pon aquello perdío. Inclusive hai una cierta discriminación ente neños y neñes, llevando éstes la peor parte.
Asina que, enantes de los llibros, l’asociación de Virginia y toles collaboradores suyes, ente elles Rosa, ficieron
una campaña pa lleva-yos botes katiuskes pa les neñes qu’andaben medio descalces. Y pa que nun s’apropiaren d’elles los neños, buscaron les más llamatives posibles pa que nun quixeren poneles: botes color fucsia, de llunarinos, estampaes, de florines, etc. pa lo que movilizaron tiendes, almacenes, donaciones, etc. El resultáu fue que llegaron a Santo Domingo camionaos de botes… de modelos «esotéricos». Y como muestra d’ello, pongo esta semeya que me fizo llegar Rosa, con dalgunes de les neñes agraciaes con esos modelos. Too, enantes de dir descalcines por esos caminos del diañu. ¿Nun ye una historia mui prestosa?
