Da igual el númberu total d’asistentes a la «mani» del día de la Diada. Lo que ta claro ye qu’hai en Cataluña un clamor d’una parte importante de la sociedá por convertise nun nuevu estáu, dientro d’Europa. Que lo consigan yá ye más complicao. El cómo se llegó a esti momentu ta dando muncho pa falar, en periódicos, televisiones, radios y tertulies de tou pelaxe. Al mio modestu talantar, que nun tien por qué se compartir, ye una mecia de distintos componentes: 1) Un componente históricu mui importante. Esa reivindicación nun ye una cosa nueva y eso que se llama «l’encaxe» de Cataluña dientro del Estáu Español yá dio muncho que falar. (Por exemplu, tengo sobre la mio mesa los discursos nes Cortes Republicanes, d’Azaña y d’Ortega, recoyíos nun llibru tituláu «Dos visiones de España». Interesante). 2) Un componente económicu, que siempre vieno arreyáu al anterior y, posiblemente, ye causa d’él. 3) La imposibilidá de tener un Estatutu nel que se recoyeren dalgunes de les reivindicaciones catalanistes, como’l términu Nación, al torgalo’l Tribunal Constitucional. 4) L’abandonu del PSOE de lluchar, pese a que lo sigan calteniendo «de boquina», por un Estáu Federal. 5) L’actitú «troglodita» de renomaos cabezaleros del PP, talo que la Esperanzona y otros, de criticar hasta l’actual Estáu de les Autonomíes,
pidiendo un Estáu más «fuerte y centralista». Lo cual nun fai sinón esacerbar les postures y los enfrentamientos. 6) La postura d’una parte del nacionalismu catalán, que siempre ta amenaciando a los socesivos gobiernos cola independencia, p’algamar determinaes coses que-yos interesen. Eso que se llama «tirar de la cuerda». Y, en fin, de xuro qu’hai dalgunes otres causes que se podíen amestar, pero tampoco nun ye cosa d’espurrise demasiao.
La entruga que se nos plantega ye: ¿Y agora, qué? ¿Tien esto vuelta atrás? ¿Tien vuelta alantre? Porque yá se dixeron munches coses difíciles d’escaecer. Y la mecha yá ta prendía, a ver quién l’apaga. Per otru llau, nun ye tan fácil secesionase d’un estáu. Habría que cortar munches atadures de tou tipu: históriques, económiques, sociales, llaborales… un enguedeyu. Y tampoco nun ta mui nidio qu’un posible referendum fueren a ganalu los independentistes. Nun hai qu’escaecer que en Cataluña hai munchos inmigrantes, nacionales y estranxeros, que nun son nacionalistes, y tamién parte de los propios catalanes. Y un referendum pa separtase d’España nun valdría con ganalu pola mínima y de penalty, habría qu’esixir una amplia mayoría (dos tercios, tres cuartos…). En fin, que la cosa ta mui complicada. Habrá que siguir atentos a los prósimos movimientos y dir esbillando’l granu de la paya. Porque, anque Cataluña tenga tolos condicionamientos pa ser una Nación, ser un Estáu, agora que los estaos tán perdiendo la so propia independencia, nun ye nada fácil. Veremos, dixo’l ciegu.
Nota final.- Escribía, esti día, de la vuelta de la manipulación a TVE. Nel Telediariu de les 21 hores, el más importante, dieron la noticia de la Gran Manifestación en quintu llugar. Depués de «rajoyazos», de la situación en Portugal, y del criminal esi que paez que mató a los niñinos. Tou un record. La BBC abrió’l so noticiariu colo de Cataluña. Y ye qu’hai informaciones y des-informaciones. Paez qu’agora piden perdón: yo nun los perdono porque fue a posta.
