La entrada en prisión de los llamaos «los Jordis» (Cuixart y Sánchez) nun pue interpretase más que como una metedura pata nun momentu en que, como nun final del axedrez, cada movimientu hai que lu mirar con lupa si nun quies perder la partida. Nun toi d’alcuerdu con (una vuelta más) el victimismu propagandísticu de llamalos «presos políticos» -el motivu nun ye poles sos idées sinón por un supuestu delitu recoyíu nel Códigu Penal- pero eso nun quita un rispiu pa consideralo un gran erru. Un erru nun momentu en que l’independentismu apaecía un migayu amatagáu, depués de los caberos movimientos producíos en Cataluña.
Pue dicise que la culpa nun ye del Gobiernu, sinón de la señora xueza que lo valoró asina, y que n’España hai separtación de poderes y bla, bla, bla… Bien cierto, pero tamién ye cierto que’l Fiscal Xeneral del Estáu ye nomáu pol Gobiernu y esti, a la so vez, ye’l xefe del restu fiscales que nun son sinón «acusadores públicos». Si el fiscal de turnu, nesti asuntu, camienta qu’hai delitu de sedición, o cualisquier otru, bien ta que lo reclame y la xueza, si tamién cree nesa posibilidá, que los encause, pero en tantu que se cellebre’l correspondiente xuiciu, los acusaos puen tar llibres ensin que, paezme a min, pueda haber peligru de fuga o daqué asemeyao. El fechu d’encarcelalos agora, preventivamente, nun tien más esplicación que’l d’un ciertu escarniu públicu que los independentistes nun quieren dexar pasar.
Otra cosa fue lo qu’ asocedió col Xefe de los Mozos, señor Trapero, al que tamién acusen d’un delitu penal, pero que dexen en llibertá a la espera d’esi xuiciu que lo dictaminará. ¿Por qué colos «Jordis» nun se fizo lo mesmo y asina nun se tuviere armao tantu xaréu inutilmente? Y hailos tovía que piden la prisión preventiva incondicional pa Trapero, pa echar más lleña al fueu. Cuidao, repito, coles últimes xugaes nel tableru d’axedrez, pues igual pienses que tas xugando una partida mui bona y al final pescancies qu’acaben de date xaque mate.
(Semeya: EFE)
