L’homenaxe que se-y tributó a la memoria del gran barítonu xixonés, Antonio Medio, nel Teatru Xovellanos, con motivu del centenariu del so nacimientu, convirtióse nuna prestosísima gala llírica con sabor asturianu. Un sabor, que nun quedó na figura del propiu homenaxeáu, sinón qu’algamó al cuartetu d’intérpretes que la llevo a cabu: la mezzosoprano Belén Genicio, el tenor Ramón Alonso, el barítonu-baxu Celestino Varela y el pianista Mario Bernardo. Toos ellos asturianos y con un altor de calidá contrastáu.
El programa yera, claro, al rodiu de la zarzuela, xéneru nel qu’Antonio Medio desendolcó tola so carrera musical, anque tamién-y dio tiempu pa ser empresariu y trabayar como actor nel cine. Pero fue nel mal llamáu «género chico» (ye un xéneru en sí mesmu, nun hai por qué lu comparar cola Opera, que ye otra cosa), onde’l nuestru personaxe algamó los cumales de la fama. Va pocu tiempu, l’Atenéu Obreru de Xixón dedicó-y otru prestosu homenaxe, más la petición al Ayuntamientu del nome d’una cai, que llueu quedó nunos xardinos que yá lleven el so nome.
Dos coses más: La primera, el bon gustu de, xunto a la zarzuela, incluyir tamién un tema llíricu asturianu, como ye l’ «Atardecer», del compositor xixonés Sergio Domingo (autor tamién, ente otres, de «Axuntábense» o «Los carromateros») con una versión pa solista mui prestosa. Y otra, nun tan prestosa. La poca xente qu’acudió a tan importante eventu (nun yéremos un terciu del aforu) n’homenaxe a un de los nuestros. Dende llueu, nun tuvo nengún de los que fueron l’otru día a lo del Salón Iberoamericanu. Una vez más. Que conste n’acta.
