close
Una rápida güeyada a les autonómiques

Una rápida güeyada a les autonómiques

2012-10-22596Visitas

Nun quiero aparame munchu tiempu en comentar los resultaos d’ayeri de les elleiciones autonómiques, pues con tanta «vara» que nos vienen dando, espertos comentaristes y tertulianos varios, la cosa yá fiede un poco. Asina que voi dicir namás dalgunes coses que se m’ocurren, pero qu’entendería que nun fueren compartíes por otros. Equí caún tien la so opinión y la cosa entovía va a quemar munches páxines.

Lo primero que pienso ye que los resultaos fueron los esperaos. Nun sé si dalgún inxenuu camentaba que’l Psoe diba a sacar más votos, pero entós ye que nun sigue lo que ta pasando. El Psoe ye nesti momentu l’únicu partíu que nun sabe a qué xuega. Los nacionalistes catalanes y vascos sí lo saben, y el PP tamién. Pero ¿y los socialistes? Porque esa «entelequia» que ximielguen dacuando del «Estáu Federal» nun lo creen nin ellos. ¿Qué pasos dieron pa ello? ¿En qué congresu diseñaron dalgo? Dende llueu, n’Asturies tenemos la impresión (polo menos téngola yo) de que tolo que resulte «identitario» ta siendo marxinao. Poro, porque díbemos creer neso d’un «Estáu Federal», entiéndese compuestu por diferentes Estaos (como los EE.XX) que deleguen determinaes competencies n’un estáu central. Igual pensarán nel restu les Autonomíes, que ye un trucu por que nun saben daveres lo qué quieren. Tando les coses asina, el que quier nacionalismu vota a CIU, al PNV o a Bildu, y el que quier Centralismu vota al PP. La cosa ye asina de clara y siguirá siéndola mentanto el Psoe nun esclarie cuál ye la so idea d’Estáu.

Que Galicia diba a votar al PP taba cantao. Siempre fue mui de dreches, y como preba (si ficiera falta) ehí tán los años de mandatu de Fraga, una momia del pasáu que reinó hasta depués de muertu. Amás, esi Feijóo paez una persona civilizada y de bon tratu. Puen perdonáse-y les sos metedures de pata. Del restu, la única sorpresa que tuvi fue ver a paecer perehí al ínclitu Beiras, que bien pensé que taría faciendo escursiones col Inserso. Pero bueno, tien de ser verdá eso de que los vieyos roqueros nunca muerren.

Tamién taba cantao que’l PNV ganare les elleiciones. Urkullu ye un nacionalista mui correutu, bon rapaz y educáu, al que pues votar (si yes nacionalista) o casalu cola to fía, si nun tuviere yá casáu con una funcionaria de la Ertzaintza. En cuantes a Bildu ye verdá que xubió, pero tampoco cola «fanfarria» que nos anuncien. Pasó d’esos doscientos mil votos que siempre se-y supunxeron, a doscientos setenta mil, lo cuál nun ta nada mal, pero que tampoco ye la octava maravía del mundu. Ye un 25% de los votos lo que, ensin cuntar con un 34% d’abstención, sedría un votu de cada cuatro. Claro qu’ellos van siguir falando en nome del «pueblu vascu», como si el restu de los vascos nun fueren tamién «pueblu vascu». En fin, que’l gobiernu central (y centralista) del señor Rajoy va a tenelo mui fácil en Galicia, pero va a tener un problema gordu n’ Euskadi onde queda claro qu’una mayoría mui cualificada del pueblu vasacu ye nacionalista. Y esto ye lo que se m’ocurre al rodiu d’estes eleiciones nes que queda claro que’l gran derrotáu ye’l Psoe. Cuesta abaxo en tol estáu, menos n’Asturies que siguimos al marxe de la vida real, regalando’l votu a quien, repetidamente, llévanos pasu ente pasu al espeñaderu. Y ye que lo nuestro, nun tien igua.