close
UNA TELEVISIÓN PÚBLICA ASTURIANA

UNA TELEVISIÓN PÚBLICA ASTURIANA

2011-10-06355Visitas

logotpaEl «Cascazu» que saltó esti día a la cai, en forma d’un posible pieslle de la TPA, ta dando pa falar abondo y dende munchos puntos de vista a la ciudadanía en xeneral. Dende la desvergoña del PP y del PSOE que nun principiu yeren contrarios a una televisión autonómica (recordemos que’l primeru que planteó’l tema foi’l PAS) hasta que pudieron facer una Tele a la so imaxen y semeyanza (o seya, col so control), hasta otros coleutivos que defenden, cómo non, los puestos de trabayu o los convenios con empreses del sector, hai opiniones pa tolos gustos.

Yo voi dicir lo que siempre dixe: ye un derroche que nun podemos permitinos, tener una televisión «xeneralista» pa ver películes de vaqueros, echar el partíu del sábadu que lu da la «Sexta» , o retrasmitir la carrera de Fórmula 1, que tamién la dan gratis n’otres cadenes. L’únicu sentíu que tien una televisión pública n’Asturies ye la de servir de cohesión territorial y de defensa de los nuestros valores y la nuestra identidá. O seya, una televisión con una programación dafechu n’asturianu, y na que tengan un llugar cimeru les manifestaciones de la nuestra cultura. Y eso nun tien porque ser aburrío. La nuestra cultura tien abondes cares.  Y noticiarios, tertulies, concursos, etc. puen perfechamente dir al rodiu de coses nuestres o que nos importen a nosotros, y de coses del restu d’España y del mundu cuntaes na nuestra llingua. Y tamién eso pue crear puestos de trabayu y convenios con empreses del sector. Per último convién recordar que los programes n’asturianu, los pocos qu’había, teníen unos mui bonos índices d’audiencia. Eso ye lo qu’hai que rescatar del futuru d’una TPA, que nun cumple los fines pa los que debiere ser creada. Porque nun ye lo mesmo una Televisión Pública Asturiana, qu’una Televisión Pública n’Asturies. Nun ye lo mesmo.