Depués del tsunami políticu, y a la espera de ver cómo queden les coses tres los pautos o lo que tenga de venir, voi dexar esa cosa tan sinsustancia de la política pa centrame no que daveres ye importante. Lo de toles selmanes. Lo de tolos años: El fútbol.
El Sporting aguantó un añu más en Primera. Ye, ensin dulda, un méritu, más entovía viendo lo «cara» que se punxo la permanencia, con un piñu d’equipos qu’igual podíen baxar que xugar la «Europaleague». Terminó baxando el Deportivu, que nun ye un equipu que me caiga muncho bien, pero que me paez que ye perxudicial pal ambiente y pa la economía. Prestábame más que tolos equipos del Norte quedaren, porque les aficiones viaxen y dexen perres, y hai munchu ambiente peles cais y nel campu. Pero bono, paez ser que s’acabaron les perres que llegaben a mares per Galicia (y a bon entendedor), y cuando nun hai panchón, toos riñen y toos tienen razón.
Yo, que soi un «antipreciadista» reconocíu (deportivamente, como paisano préstame) nun dexo de reconocer que lo del Sporting tien méritu, con un presupuestu mui axustáu y mirando poles perres. Claro que, al final, cuasi «la caga», porque mandar a Malága a los reserves, faltando tres xornaes pa finar, ye pa matalu. ¿Pa cuándo los quería reservar, pa la final de la Champions? La primer vuelta foi pa escaecela dafechu, de xuegu y puntos. La segunda, en cambiu, foi perbona partiendo, sobre too, d’una gran seguranza defensiva, que ye peronde hai qu’emprimar les coses. Si amarramos que nun nos metan goles, hai muncho ganao. Aquella temporada en que nun s’empataba nengún partíu yera pa matar al entrenador. El porteru Juan Pablo ye mui seguru, coles cosuques que tien un puestu tan comprometíu onde naide pue enmendate los fallos. La defensa de la segunda vuelta, fenomenal. Con un Lora que pide a voces dir pa la seleición, la rectificación de Botía (que principió floxu) y la seguridá d’Ivan Hernández, pol que va un par de temporaes naide daba un duru (o un euru). El llateral zurdu, con Canella y Cote, ta aseguráu, y ye llóxico que trespasen a un de los dos. Yo, prefiero a Canella, que tien más cabeza que l’alloriáu de Cote, anque esti tien unes condiciones espléndides y lesiónase menos. Dicen que va pal Barsa. Que lu cobren bien, qu’ehí hai perres.
El centru del campu beneficióse de la salida de Nacho Cases. Nun tanto porque’l rapaz seya un fenómenu, cuanto porque la so entrada recompuso un centru’l campu más racional, y empezóse a xugar la pelota, non con esos patadones que se daben enantes pa que corriesen los delanteros, siempre en desventaxa. Sobresaliente De las Cuevas, muncho menos intermitente que n’otres temporaes y dando siempre la nota de calidá. Un gran profesional Diego Castro, tamién con gran calidá y metiendo goles. Una llástima’l nun facer dalgo más pa retenelu, porque se pudo. Y ehí, el «bocaces» del dueñu del equipu echólo too a perder. ¡Que bien taba calláu! L’equipu va a notar la so marcha. En cambiu, deceicionóme Nacho Novo, que venía precedíu de gran fama. Molestóse, pero nun fizo munches coses de méritu. A ver si, yá meyor adautáu, la temporada viniente lo fai meyor. El portuguesín esi de la cara colorada empezó mui bien, pero fue a menos. Ye aprovechable, pero ensin posponer a dalgún rapaz de la nuestra cantera, que los hai con bones condiciones. Y alantre… poca cosa. La voluntá de Barral y más nada. Son los delanteros que menos goles metieron en tola Primera División. A ver si traen a Nino, del Tenerife, que con 31 años, y la so pequeña estatura, xuega con toos ellos al llombu.
En cuantes a los «pexes gordos», esa ye otra lliga. El «canalla» (Preciado dixit) de Mouriño tiró la Lliga escontra’l Barsa, sacando a un equipu ensin delanteros y xugando a non xugar. Dio-y resultáu na Copa del Borbón, porque a un solu partíu cualquiera pue ganar a cualquiera, pero nos enfrentamientos de Lliga amosó un mieu fatal. Dexó na caseta a los tres delanteros que tenía y consiguió desesperar a Ozil, el xugador de más clase que tien el Madrid. El fechu de qu’un equipu que marca 102 goles, nun tirara a gol una sola vez, dizlo too. El Barsa, pues, ensin ser el d’otros años (tán dalgo «quemaos») foi xustu vencedor. Y una mención a los 40 goles de Cristiano Ronaldo. Ye un númberu qu’asusta. Pero nun se pue dicir que batió los 38 de Zarra, porque na Lliga que xugó Zarra había cuatro equipos menos, o seya, ocho partíos menos. Con too y con eso, pa quitase la gorra… anque yo, que nun soi del Barsa, prefiero a Messi. Y Colorín, colorao, esta Lliga s’acabao. Hasta l’añu que vien.
