close
VOXTERIS: la voz de la escombrera

VOXTERIS: la voz de la escombrera

2012-05-06Rafa LorenzoVoxteris878Visitas

Voxteris ye un guapísimu proyeutu, entamáu pol músicu belga Michael Azäis, qu’atropa na so tierra natal a un piñu importante de cantautores europeos, de llingües minoritaries, al rodiu del tema de la mina, los mineros y la emigración. Ocho son los cantantes escoyíos pa la edición d’esti añu, ente ellos el mio almiráu amigu Rafa Lorenzo, cantante tinetense que lleva dende los anicios del Surdimientu faciéndonos llegar la so voz y la so poesía enllenes de fuercia y sentimientu. El cantante vaqueiru va intervenir nel alcuentru musical con tres cancios, como tienen de facer toos ellos: un canciu propiu, nesti casu De l’antracita… del so discu «La otra Asturias» (Fonoastur 1997); una adautación propia de la canción popular Nel pozu María Luisa… ; y una canción, cantada a comuña col restu los participantes, na que caún d’ellos canta un párrafu na so llingua propia llográndose un resultáu coleutivu que resulta perguapu. Esa canción a comuña ye, precisamente, Voxteris, que vien a ser dalgo asina como «la voz de la escombrera», creación del propiu Azäis. Pa que vos faigáis una idea del resultáu, póngovos un enllaz onde hai una parte del total, el que correspuende al párrafu n’asturianu de Rafa Lorenzo, el del cantante italianu y el Valón. El festival cellébrase en Lieja (Bélgica), el prósimu sábadu día 19. Un abrazu mui fuerte pa Rafa y toi seguru de que too va a salir perbién. ¡Ánimu collaciu!