«CONSUMMATUM EST».- Yá pueden tar contentos: consiguieron cargase al direutor del Festival de Cine Internacional de Xixón. Un cargu que durante más de 30 años fue consideráu «de confianza», y por tanto decidíu pol equipu que gobernara la ciudá. Asina los socesivos gobiernos del PSOE nombraron a quien-yos petó, pero cuando l’actual gobiernu de Foro Asturies llegó al poder punxéronlos pingando por facer lo mesmo qu’ellos veníen faciendo dende tiempos inmemoriales, o seya, poner a una persona de la so confianza. Agora’l señor Nacho Carballo, que dirixó’l certame estos dos últimos años con unos recortes abondosos, y con bastante ésitu, queda fuera y paez que va a facese cargu del mesmu un paisano de Valladolid. Mentanto, l’anterior direutor puestu a deu pol PSOE, l’ínclitu señor Cienfuegos, entra pola puerta d’atrás nesi amagüestu de la Cineteca (o como coño se llame) de la Llaboral, nombráu otra vez a deu. Casu flagrante de manipulación. Equí val too.
VILLANCICOS.- Prestábame dir a la Ilesia San Xosé a sentir cantar a la Coral Polifónica Xixonesa, de la que fui forofu munchos años sobre too cuando la dirixía el gran Anselmo Solar. Pero resultó que lleí’l programa del Conciertu y vi qu’había villancicos n’alemán, n’inglés, en castellán, en catalán y n’euskera. Nin un solu de la so tierra. Nengún n’asturianu. Eso ye facer patria y lo demás babayaes. Claro, quedéme en casa.
METROTRÉN.- La vista del abandonu de los túneles que se ficieron p’aquella patraña que fue’l Metrotrén, da perceguera. La pila millones que se sapozaron nesi proyeutu, inútil ya innecesariu, fue tal que los responsable deberíen tar delantre un xuez. Agora traen a un xeólogu pa que diga qu’asina se conserva meyor. ¿Consérvase meyor pa qué? ¿O ye que los túneles son un fin en sí mesmu? Eso pa la ciudá ye un fracasu, un espoliu y un focu d’inmundicies. Que nun vengan con cuentos.
