close
Y los partíos asturianos ¿qué dicen?

Y los partíos asturianos ¿qué dicen?

2014-11-13417Visitas

La señeraLlevamos un tiempu asistiendo a una especie de partíu de tenis ente lo que paez que se llama España y lo que paez que se llama Cataluña. Unos dan, otros devuelven y la cosa torna a empezar. Hai puntos de saque, boles que dan na llinia y otres que van nidiamente fuera. Pero hai tamién un grupu de xente que se dedica a la política, profesión güei en día remunerada, y que callen como afogaos asistiendo, como nós, a un partíu nel que debieren ser dalgo más qu’espeutadores. Hailos en toles comunidaes, pero a min los que m’interesen son los del mio País: Asturies.

Porque les posiciones de los partíos estatales salen un y otro día na Tele (paréntesis: el Telediariu de les 3 de la tarde d’esti día, na cadena 1, ye’l más manipuláu que vi dende los años del famosu Urdaci. Debe ser que yá entró’l subdireutor de La Razón como xefe informativos. Zarro’l paréntesis). Asina sabemos que Rajoy (PP) nun va a movese del so sitiu nin anque-y echen agua caliente penriba. Val, ye lo esperable. Pero llueu hai otros qu’enfaticen muncho…. vanalidaes. Porque una vanalidá ye lo que diz el «guaperas» esi del PSOE que siempre s’enchipa pa dicir eso del diálogu, del cambiu de la Constitución y del federalismu. Lo que nun diz ye sobre qué hai que dialogar. Qué ye lo que pon el enriba la mesa, en qué consisten los cambios constitucionales qu’él faría, y que clas de federalismu defende. Y si esto nun se diz, ye como nun dicir nada, Sí, dialoguemos, mui bien. Cambiemos la Consti, val. Federémonos, coyonudo. Pero, oiga, esplique cómo y cuándo, y «si ye duro o ye blando». Porque quedase nos enunciaos ye nun dicir nada. De UPyD na podemos esperar, da la impresión de que la so «lideresa» quería que’l gobiernu sacare los tanques a la cai pa que la xente nun votare. Ella nun lo dixo asina, pero al echa-y la culpa al Gobiernu de «blandura» tres la decisión del Constitucional paez que ye lo que se deduz. A Podemos naide-y entruga nada, o seya que nada sabemos (polo menos yo). Y lo d’Izquierda Xunida ye como siempre: van colos de la feria y vuelven colos del mercáu.

Si los partíos estatales dicen (o seya, nun dicen) eso, llóxicamente los de «provincies», como los nuestros, a callar, claro. Pero ye que nosotros,Bielorrusia cuando votamos, nun lo faemos a Rajoy, nin al «guaperas», nin a Rosa Díez, faémoslo (los que lo faen) a Mercedites, a Fernández «el silente», o al que-y correspuenda (de verdá que nun lo sé) d’Izquierda Xunida. Y ellos tamién teníen que dicir dalgo nesi futuru que, d’una manera o otra, nos espera. Porque tendrá que llegar el día en qu’esti tema se racionalice (agora ye too pura «emoción») y se ponga enriba la mesa. Y yá dalgunos intelectuales principien a dar pistes, ensin dir más lloñe Pedro de Silva en La Nueva España. Fálase, entós, pa contentar a Cataluña y el so famosu «encaxe» dientro del Estáu, d’un «federalismu asimétricu». Lo cual quier dicir, nin más nin menos, que con favoritismu y con prerrogatives d’unes comunidaes respeutu a otres. ¿De qué clas seríen eses prerrogatives catalanes? ¿Económiques, con un conciertu como los vascos? ¿Fiscales? ¿Toes xuntes?

Lo que quiero dicir, y digo, ye que yo nun quiero que pa que Cataluña siga perteneciendo al Estáu Español, Asturies tenga que quedar, una vuelta más, nun segundu planu políticu-económicu-sociocultural. A min daríame satamente igual que los catalanes se ficieren independientes o que se xuntaren a Bielorusia, lo único que yo nun quiero ye que’l mio País quede peor de lo que yá ta. Y eso ye lo que creo que debieren dicir los partíos asturianos -toos, nun sólo los estatales- al rodiu d’eso que paez que nun se quier dicir, pero que se diz. Yá ta bien de ser violaos y encima tener que poner la cama.

P.D. Nes semeyes, la Señera y el escudu de Bielorrusia