Conoció’l trunfu mui mozu, un trunfu a base esfuerciu y entrenamientu, y unes facultaes físiques qu’engañaben. Nun paecía especialmente dotáu pal saltu. Viendo la esbelta y musculada figura d’un, por exemplu, Carl Lewis, naide podría dicir que Yago Lamela pudiere dedicase a la mesma especialidá, y ensin embargu asina yera. Nun sólo dedicase, sinón destacar grandemente llegando a ser subcampeón mundial. La so marca, que ye bonísima, queda nostante lloñe de les grandes marques mundiales: 8,95 de Mike Powell, 8,90 de Bob Beamon e inclusive los 8,87 del propiu Lewis, pero los 8,56 del avilesín paecíen imposibles d’algamar pa un atleta español y, sobre too, de les sos carauterístiques físiques.
¿Podemos considerar a Yago otru «xuguete rotu»? Yá sabemos, esos trunfadores en cualquier campu que fuere (nun sólo nel deporte, anque ésti se lleve la palma) y llueu incapaces d’adaptase a la vida real, a la rutina de les coses, a l’ausencia de focos, aplausos y bambalines. Yo creo que sí. Al marxe de lo que diga l’autopsia, nun cabe dulda de la cuesta abaxo del nuestru atleta, alloñáu de los estadios pola mor d’una grave lesión nel talón d’Aquiles que lu fizo retirase. Vendría, entós, a engrandar esa llarga llista de famosos derrotaos, non tanto polos contrarios, como pola propia vida. Una llista na que podríemos poner nomes como los boxeadores Perico Fernández o Poli Díaz. Los ciclistes Chava Jimenez o «el pirata» Pantani. El waterpolista Jesús Rollán… Yo recuerdo mui nidiamente cuando’l famosu Urtain tiróse d’un décimu pisu poco enantes de desahucialu. En fin, pa qué siguir.
Y ye que cuesta trabayu asimilar que la fama y la gloria son efímeres. Fumu que dura un tiempu pero termina esmuciéndose nel aire. Poro, la importancia de preparase «pal depués». La vida d’un deportista, por llarga que seya, ye mui curtia, y hai qu’aprender a vivir na normalidá de la xente. Estudiar, trabayar, tener un plan de vida. Porque 36 años son mui pocos p’abandonar esti mundu, onde más alló de los aplausos y los reconocimientos, hai munches coses que facer, por un mesmu y polos demás. Descanse en paz Yago Lamela, camín yá de la eternidá.
P.D. A última hora diz el diariu La Nueva España que l’atleta asturianu morrió d’un infartu. Allégrome sobre too pola familia, anque ello nun invalida nada de lo qu’equí escribimos.
