Y tampoco nun fui Charlie Hebdo anque condenare a los asesinos que-yos punxeren una bomba nes oficines. Hai agora una tendencia a identificase con determinaes persones o grupos con eses afirmaciones coleitives de “Toos somos Charlie Hebdo” o nesti casu esi raperu catalán. Nun sé mui bien, dígolo honestamente, si la llibertá d’espresión tien que facese cargu d’insultos gratuitos a les creencies de los otros o a sentir selemente cómo s’alienda a grupos terroristes a que sigan matando. Igual sí. Pero eso nun disculpa a los zoquetes que provoquen unes situaciones innecesaries esperando que llueu salgamos a la cai glayando que nosotros somos ellos.
Dalgunos de nosotros, que somos muncho más vieyos qu’esos que salen a incendiar y agredir en nome d’esa supuesta llibertá, tuvimos que la reclamar cuando’l facelo sí que yera un riesgu personal que te xugabes porque nos teníen secuestrada la pallabra. Cuarenta años de franquismu nos costó poder algamar esi derechu pa qu’agora un pelamangos que va d’ácrata pretenda facese famosu a base de faltosaes. Nin cantante, nin poeta, nin revolucionariu. Y eso nun tien nada que ver con que se critique a unos Reis, los Borbones, pero a tolos Reis en xeneral, que fueron y son un castigu pal pueblu español. Hai formes civilizaes de facelo que nos traxo una democracia que nun vieno regalada, hubo que la ganar y a munchos costó-yos sangre, cárcel y marxinación.
Nun quiero siguir porque se me calienta’l sangre. Seguro que, pa la xente como esi Hasél yo seré un facha y nun sé cuantes coses más. Pero conmigo que nun cuente p’alendar a unos asesinos a que produzcan más dolor del que yá causaron, nin pa que salga a la cai a pidir pa él una llibertá d’espresión que ñació pa defender a la xente que lluchaba y llucha escontra les dictadures. Y hai munchos exemplos nel mundu actual onde podría dir a esixila. Anque igual non lu trataben tan bien.
(Semeya: La Vanguardia)
