Sara Mesa ñació en Madrid en 1976, anque la ciudá onde vivió y reside ye Sevilla. Autora mui prestixada pola crítica, el diariu El País escoyóla como l’autora más importante del añu 2020, paezme que pente medies d’una escoyeta que fizo ente xente de la so confianza. Ganadora de dellos premios, tenía interés en lleer dalgo d’ella y conocer el so estilu lliterariu. Escoyí pa ello una de les sos últimes publicaciones que lleva por títulu “Cara de pan”. Ye una novelina curtia na que se cunta la rellación d’una neña adolescente (tien “casi” 14 años) y un señor mayor. Dicho asina suena como dalgo un poco escuro o pornográfico, pero nun hai nada d’ello nesta historia. ¿Podría, entós, ser dalgo de tipu poéticu, platónicu…? Pues tampoco. Los dos protagonistes de la novela escueyen pa la so rellación un nomatu pol que se reconocen y la propia autora tamién, nes partes nes qu’ésta intervién como narradora. Asina ella ye “Casi” (lo que-y falta pa cumplir los 14) y el ye “Viejo”, anque nun pasó de los sesenta.
Casi y Viejo vense tolos díes nun parque d’una ciudá onde ella s’escuende, porque nun quier dir a clas, y él vagamundea ensin nada que facer más qu’amirar los páxaros, que ye la so verdadera vocación. Ellí, detrás d’unos parterres un poco tapecíos, formen un mundu aparte del mundu normal, del que dambos son fuxitivos. Casi, porque nun se siente aceptada por profesores nin compañeres, anque namás se fala d’una, y Viejo porque tien la cabeza un poco perdida, depués de pasar por un centru psiquiátricu nel que tuvo un tiempu.
La verdá ye que a min la novela resultóme abondo increíble. En primer llugar porque nun entiendo como una neña d’esa edá, nuna familia que paez bien estructurada, pue faltar más de dos meses a clas ensin que naide se dea cuenta. Nin los padres, nin na escuela. Ella sal de casa a la hora, marcha pal parque y vuelve cuando vuelven los sos compañeros. Nun sé de qué falarán na so casa, nin qué controles tienen nun centru escolar pa qu’esto seya a suceder. L’autora descríbelo como si fuere un fechu más o menos normal. Llueu la rellación ente los dos personaxe rínchame bastante. Más qu’un diálogu o una complicidá ente ellos, lo que se da ye una sucesión de pensamientos un poco esllavazaos o, cuando más, unos monólogos que nun lleguen a formar un diálogu. Él fala de los páxaros y ella escucha o cuenta coses ensin munchu valir del so pequeñu mundu. Queda nidio, enseguida, qu’ella nun ta conforme col so cuerpu, como toles adolescentes del mundu y que lleva mal qu’una compañera se coñe d’ella. Y tamién queda claro qu’elli ye una persona sensible que ta desequilibráu y ye un poco vagamundu. Nun sé si la historia tien munches más llectures, igual ye que yo nun fui a veles. En cuantes a la forma escribir sigui esa moda que me revienta enforma d’escribilo too siguío, ensin respetar los diálogos, como si fuere solo testu narrativu. Fádiame bastante.
En fin, habrá que da-y otra oportunidá a escritora tan valorada, pero’l mio primer averamientu a la so obra nun pasó del regular. Siéntolo.
