Ye’l primer espeutáculu al que voi, sacante una pequeña presentación que fici nuna llibrería, dende l’aniciu la pandemia: Un añu y mediu. Y préstame que fuere precisamente a ver al grupu de teatru “El Callejón del Gato” y a la obra “Cine María Cristina”. Con ellos, colos “cómicos”, xúneme una gran amistá, sobre too con Moises y Ana Eva, amás de tener collaborao en delles ocasiones en forma de tornes al asturianu d’obres suyes: “Graninos de cardamomu”, “Crecer” (de Maxi Rodríguez), etc. Mui prestoso. En cuantes a esta obra en custión dicir que fue ganadora del concursu entamáu pol Teatru Xovellanos y na que tamién punxe’l mio granín de sable en forma de voz en “off” falando, xunto con otres persones, de lo que supunxo pa min el cine cuando yera neñu.
“Cine María Cristina” ye una obra referencial, ye dicir, igual podría referise a cualisquier otru cine de cualisquier otra ciudá. Ye una más d’aquelles glorioses sales a les que díbemos a antroxar, pero tamién a quitar el fríu que siempre llevábemos a recostín y a namoramos de dalguna d’aquelles maravioses actrices qu’enllenaben les nuestres pantalles y la nuestra vida. Una parte importante de la infancia de toa una xeneración fraguóse nun cine como’l del títulu.
La obra del “Callejón del gato” amuesa, nuna especie de máxicu puzzle, dellos cachinos de la vida dientro’l celuloide, que yera una prollongación de la nuestra vida real. Poro son capaces d’emocionanos, de divertinos y d’enllenanos de señaldá escenes como la de les películes de terror, el baille de Sarita Montiel col proyeucionista o la simpatiquísima del acomodador, mazcaráu de James Dean, estreldándoses col coche acompangáu del restu’l personal. Igualmente bien tán les carauterizaciones de los estremaos oficios dientro la profesión: la taquillera, l’acomodador, el proyeucionista, la encargada’l cine… caún d’ellos perfaciendo’l so papel de mou almirable, como cuando echaben a los que queríen colase o a los que molestaben a los otros espeutadores.
Obra, pues, que fadrá les delicies de los que conocimos aquelles sales yá esapaecíes y dará conocencia a los que ven el cine d’otres maneres de cómo yera aquel mundiu que yera muncho más que ficción: yera una parte fondera de la nuestra vida real, lo que ye muncho dicir. Norabona a los amigos del «Callejón del gato» por tan bonos recuerdos.
