Está ye una novela de David Artime. Y esto nun quier dicir sólo que la escribió David Artime, lo cuál dase por supuesto, sinón que sabemos ya d’aniciu que va a tener un estilu determináu, marca de la casa. Hai noveles y hai autores que podríen ser dafechamente intercambiables, dicho ello non nun sentíu peyorativu, sinón que tal o cuál novela dícenme que ye de fulanitu o de menganitu y podría fácilmente creyelo. Nun asocede eso coles obres d’Artime que son úniques y esclusives del autor. Eso, de mano, ye mui bono. Quiero dicir, y digo, que si somos a reconocer un estilu propiu y unes zunes lliteraries esclusives ye que tamos ante un escritor diferente, y esa diferencia ye importante nun mundu como ye’l lliterariu one hai tanta semeyanza y hasta dalgún plaxu baratu.
Lo que pasa ye qu’esi reconocimientu por sí solu non abasta. Y asina, dientro del so estilu reconocible, Artime tien coses meyores y coses peores. Al mio modestu talantar ésta nun entra dentro de les meyores o, polo menos, de les que a min más me presten, lo cuál seguramente nun ye lo mesmo. Estes «Cróniques d’un machista feminazi» participen de munches de les notes carauterístiques del autor: un tema fronterizu, dacuando un poco marxinal; un llinguaxe popular, cuasi de chigre, enllenu de hiperrrealismos, tacos, frases escarniaes; y unos personaxes-tipu que se representen, nun sólo asina mesmos, sinón a toa una tipoloxía social. Si en «La bufanda» l’autor entraba a sacu nel mundu de los «ultres» de fútbol, y na mui interesante «Incorrectos» averábase al espaciu d’etarras y neonazis, en «Croniques…» esplora, dientro del so mundu referencial, les llamaes «nueves masculinidaes» y los grupos, más menos radicalizaos, de muyeres feministes.
Too na novela d’Artime ye una coña, paródica, esperpéntica, descomanada. Lo qu’asocede ye que ta tratando d’un tema que llevanta munches angüeñes y pa muncha xente nun debiere banalizase, anque de too ello tamién pudiere surdir un puntu pal debate. En cualquier casu, al autor nun paez importa-y lo políticamente correuto y «columpiase» en cada páxina, en cada capítulu, en cata d’un más difícil entovía, colo que tamos esperando a ver a quien-y da’l palu siguiente. Ye como aquel personaxe clásicu del teatru de Títeres que sal con una estaca y entama a dar estacazos a tol que s’allega hasta ellí. Y tol que s’allega ye la escala social completa. Namás un personaxe ye, al mio xuiciu, tratáu con una cierta empatía. Ye’l personaxe de Lola, trabayadora nun bar, con un xefe machista y aprovecháu, y al que l’autor paez tratar (a Lola) con una cierta dignidá.
Nin Bukowsky nin Carver, nin otros representantes del «realismu suciu» podríen ganar al nuestru autor llariegu na descripción de situaciones de sexu… vamos llamar «esplícitu». A min, la verdá, tanta «esplicitú» sóbrame un poco, pero igual ye que yo soi un poco remilgáu. El casu ye que tanto los paisanos que desfilen poles paxines de la novela, como les muyeres radicalizaes que tamién desfilen, queden abondo mal paraos, ensin estremar, nel so casu, quién ye mayor responsable. En fin, que tenemos nueva novela de David Artime, lo cuál ye siempre una bona noticia porque ye un autor que nun dexa indiferente a naide. Eso, nesti mundu un poco monótonu de la nuestra lliteratura, ye mui saludable.
