Los caberos años, amestándose a la Selmana de les Lletres y, entiendo yo, como homenaxe a los nuestros escritores, publícase una antoloxía de microrrellatos na que collaboren una gran parte de la nómina de los que güei nos dedicamos a la creación en llingua asturiana. El tema viennos dau, y suel tener rellación col personaxe homenaxeáu. El másimu d’estensión ye de nueve llinies d’ordenador. Esti añu, dedicáu al gran amigu Manfer de la Llera, el tema xenéricu que se nos dio foi’l de la mina, y’l títulu del llibru ye’l del empiezu d’esti comentariu: «Cuantu carbón saldría» que ye un versu del poeta de la cuenca. Pa más aquello, dellos de los microrrellatos lleense nel Parlamentu Asturianu, por parte de políticos o d’otres autoridaes qu’ellí concurren.
Ye una llástima que’l llibrín nun se venda y que nun haya posibilidá d’atopalu en llibreríes o n’otros llugares d’alcuentru, como biblioteques, etc. Y digo que ye una llástima porque tanto la nómina d’escritores, como la calidá d’esos cuentos piquiñinos, paga la pena.
Güei, viniendo d’Uviéu nel ALSA, diome tiempu a lleelos toos, y la verdá ye que foi un verdaderu placer. Tengo de
dicir qu’equí xueguen con ventaxa los poetes, porque ye muncho más fácil escribir un pequeñu poema de nueve llinies, que cuntar una mínima historia en tan curtiu espaciu. Poro, quiciás los «rellatos» que más me prestaron fueron los de los y les poetes: «La serena», de Xosé Bolado; «De color cobrizo», d’Esther Prieto; «La mina en silenciu», d’Humberto Gonzali; «Repartir carbón», de Lourdes Álvarez… D’ente los narradores hai tamién coses perguapes. Sorprendióme, por exemplu, «Una llárima na cocacola», de Luz Pontón. Y mui guapos «Con Rosa na carbonera», de Carmen Gómez Ojea; el final de «Memoria», de Adolfo Camilo Díaz; «Truches», de Chechu García y «Acebache», d’Iris Díaz Trancho, anque toos ellos, unos y otros, tienen un altor mediu mui altu. Yo collaboré con un minicuentu que titulé «Tradición», y espero nun desmerecer demasiao al llau de tantos y tan bonos escritores. En cualquier casu, resulta mui prestoso tar arropáu por tan bona compañía y que’l to nome se xuna a toa una riestra de collacios a los que respetes y almires, xuntos trabayando pol esparcimientu de la nuestra lliteratura y de la nuestra llingua. Norabona a toos. Creo que Manfer taría contentu.
