Nel añu 2009 la escritora xixonesa Iris Díaz Trancho publicó, cola siempre trabayadora editorial Trabe, un guapísimu llibru tituláu «La neña de les trences al revés». Ye la pequeña historia de dos neñes que viven en continentes distintos, Thana n’África y Deva n’Asturies. Nun sé cuántos kilómetros hai ente Mali y Xixón pero son munchos. Como ye llóxico ca una de les neñes tien la so propia llingua, los sos vezos y costumes, inclusive la so propia conceición infantil del mundu. Pero tienen tamién munches coses comunes, compartíes. Un día, pente medies d’una favoratible lluna qu’encartia como espeyu, dambes puen vese, charrar y llegar a conocese un poco y ver que sí, qu’esisten eses coses compartíes que xunen a tolos neños y neñes del mundu, porque toos ellos viven nun espaciu común que ye la edá y comparten un cachín del mesmu planeta.
La compañía de teatru «El callejón del gato», que tantos y tan prestosos títulos llevó a la escena con gran ésitu, da agora una vuelta de tuerca treslladando la guapa historia d’Iris na menos qu’al Teatru de Títeres. Lleven con ella, nestos caberos meses, una montonera de representaciones en media España porque, amás, tuvieron l’aciertu de representala en castellán o n’asturianu según el llugar onde la echen. Ayer tuvi la suerte de vela nel Paséu de Begoña, en Xixón, al aire llibre. Y esto que pudiere ser una llimitación (nun teatru hai meyor sonoridá, xuegos de lluces…) en realidá dio-y una encantadora senciellez que la fizo ser, digo yo, más fiel a les intenciones de l’autora. El grupu de teatru, qu’esti día fueron Ana Eva Guerra, Moises González y Marino Villa (na parte téunica), ficieron un perfeutu montaxe, ayudándose namás que d’unos cestos, unes pizarres, unes tresparencies, y munchu papel, cartón, madera y pegamín. Soníu y música. Sólo con ello llograron dar vida a les neñes, la ciudá, el desiertu, los animales, la lluna, y lo demás que se m’escaez, pa tresmitir esi mensaxe ecolóxicu y d’amistanza que la historia caltién. Un llabor finu, seriu y divertíu, siempre amable y con una fechura perfeuta. Recomendaríavos a tolos qu’entovía nun visteis la función que nun vos la perdáis. Nun cayer nesa trampa de la edá que recomienda pa estos o p’aquellos grupos. Ye pa toos, y dígolo yo que lo pasé «guay».
