Nun conocía al autor d’esta guapa novela, de nome Rhidian Brook y nacionalidá británica. Escritor, guionista y collaborador en dellos periódicos, ésta yera la so primer novela d’ehí que nun fuera un autor conocíu. Na realidá escoyí la novela pol resume que fai la propia editorial que la publica, que ye Lumen, cosa que nunca debe facese porque entós deberíemos mercar tolos llibros que se publiquen, encesamente recomendaos pa la so llectura. Pero dalgo había nel tema argumental que me prestó y… acerté dafechu.
Tamos recién finada la Segunda Guerra Mundial y na ciudá d’Hamburgo, una de les más castigaes polos bombardeos aliaos, tán instalaos los británicos por mor del repartu ente los cuatro exércitos vencedores. Esi ye’l destín del Coronel Lewis Morgan que tien que llograr que la ciudá principie a funcionar y a iniciar la so reconstruición. Y p’allá va’l Coronel cola so familia, la muyer y el fíu de doce o trece años. La mansión que-yos axudiquen como vivienda ta ocupada por un arquiteutu alemán que perdió a la so muyer nun bombardéu y vive cola so fía adolescente qu’odia a los aliaos. La familia alemana debiere abandonar la casa en favor de la familia inglesa, pero’l Coronel que ye una bona persona, decide que dambos compartan la casa asitiándose una en cada pisu. Asina entama esta interesante novela na que podemos ver que la destruición de la guerra nun ye sólo física, sinón tamién moral y sentimental. El mundu de fuera necesita reconstruición, pero tamién el mundu interior de cada familia y de cada individuu la necesita. D’ehí surde la forma de rellacionase de los habitantes de la mansión y les reaiciones que van teniendo a lo llargo la convivencia. Nun hai bonos nin malos nesti panorama desoláu d’Hamburgo, sino seres humanos que pretenden afayar la felicidá o polo menos la tranquilidá depués de los desgarros personales que-yos dexó la guerra. A unos y a otros.
Tolos personaxes tán mui bien diseñaos y son consecuentes col papel que-yos tocó representar, anque ún nun dexa de sentir una señaldá especial pol Coronel Morgan, home honráu que quier cumplir bien la so obligación mentanto trata de recuperar l’amor de la so muyer de la que lu separa una gran desgracia. Escrita de mou cenciellu y entrañable, “El día que vendrá” ye una pequeña-gran novela qu’engancha dende’l primer momentu, tanto pola historia que nos cuenta como polos personaxes que la componen. Encamiento la so llectura cola seguridá de que va a prestavos como a min. Y yo nun soi de la editorial, claro…
