Hai vegaes que la prosimidá d’unos fechos o d’unes persones, la familiaridá del tratu o, inclusive, l’amistanza, nun nos dexen valorar na so xusta midía la importancia de lo que tenemos al llau. Esi tópicu de que «los árboles nun dexen ver la viesca» tien, como cuasi tolos tópicos, la so parte de verdá.
Faigo esta antoxana pa dicir qu’esti día, asistiendo a la comunicación que presentó Mª Mar Martín nes «XXIX Xornaes Internacionales d’Estudiu», titulada: Biblioteca virtual Mª Josefa Canellada: Lliteratura infantil y xuvenil, dime cuenta del pergrande trabayu desendolcáu por Mª Mar y del perguapu resultáu que vien algamando con esa ferramienta tan necesaria.
Ensin grandes titulares nin reconocimientos, ensin nenguna axuda económica (l’añu pasáu diéron-y una pequeña subvención y, al querer rebaxá-yla esti añu renunció a ella porque dixo que «nun quería llimosnes»), nin de les grandes instituciones del Principáu, y nun sólo les oficiales, la Biblioteca de Mª Mar (voi permitime llamala asina), tien unos conteníos cada vuelta más interesantes pa tou aquel que quiera conocer, de cerca y a fondu, la nuestra LLIX. Podéis dar una revolada por ella y dir picando nes distintes estayes que la conformen: Biografíes y bibliografíes de tolos autores, videos d’entrevistes o de cuentacuentos, fonoteca… Un fondu de materiales impagable pa maestros, padres, críticos, neños o simples aficionaos que, d’esi mou, disponen (disponemos) d’un conocimientu de primera mano d’esi mundu lliterariu, dacuando menospreciáu, pero que ye la basa fundamental pal afitamientu futuru de la nuestra llingua.
Yo, que tuvi la suerte de siguir de cerca’l nacimientu y el desendolcu de la Biblioteca virtual Mª Josefa Canellada (inclusive enantes de tener esi nome), quiero agradece-y a la mio amiga, la neña de les cuatro «emes» (Mª Mar Martín Martín), tol trabayu y tola dedicación a esa importantísima xera, y alendala a que, pesie a la soledá que dacuando l’arrodia, nun desmaye nun esfuerzu básicu pal futuru de la nuestra llingua y de la nuestra lliteratura. Dalgunos, polo menos, queremos agradecé-ylo.
Y pa los qu’entovía nun vos dio por echar una güeyadina a la Biblioteca,
animávos a que lo faigáis, pasando por www.canellada.com Veréis como vos presta.
