El veteranu grupu de teatru Telón de Fondo presentó esti domingu nel Teatru Xovellanos la so obra «El xuegu de Yalta». Ye almirable cómo depués de tantos años, el grupu encabezáu por Lluis Antón González y Xuliu Vigil sigue con una moral a preba de bombes enriba los escenarios, ufiertando obres n’asturianu pese a la falta axudes y, en munchos casos, la indiferencia de los propios falantes del nuestru idioma. Asina s’amosó, una vuelta más, na escasa presencia de públicu nel teatru lo cuál tien de ser dafechamente desmoralizador pa unes persones que, lo único que tienen ye, precisamente, el calor y la aceutación d’aquellos a quienes va empobinada la obra: los amantes del teatru, sí, pero sobre too usuarios de la llingua asturiana.
En cuantes a la obra, ye una adautación del escritor irlandés Brian Friel, fallecíu casualmente va unos pocos meses, d’un cuentu d’Antón Chejov –La dama del perrín– y vertida al asturianu pol propiu Lluis Antón González. Trátase, en realidá, d’una pequeña anéudota, un asuntu trivial y clásicu, como ye l’enamoramientu nuna ciudá vacacional, de dos persones que se conocen y se xunten un poco por casualidá. Asina en Yalta, ciudá de Crimea a la oriella del Mar Negru, un personaxe vividor Dimitry Gurov, asedia y enamora a una dama -Ana Sergueyevna- que vien a descansar, escaeciéndose per unos díes de maríu y fíos que la esperen, como la rutina davezu, a la so vuelta a casa.
La obra vien cuntada nuna serie de monólogos de dambos personaxes, nos que se xuega cola realidá y la ficción,
coles vides verdaderes y les falses, aportando un momentu nel que nun sé sabe bien cuál ye cuál. Neso consiste, precisamente, «el xuegu de Yalta», en tar sentaos nuna terraza tomando dalgo ya imaxinando la vida de los que t’arrodien. Creándo-yos un personaxe imaxinariu con un pasáu o un futuru que s’inventa como un xuegu. Pero a la fin, los nuestros personaxes nun saben si vivieron esos momentos apasionaos, o fueron tamien frutu de la so propia imaxinación.
Mui bien Lluis Antón nel papel de Dimitry. Principió un poco baxu de tonu talo que nos costaba sentilu bien dende la fila 12, pero pasu ente pasu fue regulando la voz hasta completar un personaxe mui bien dibuxáu. Mui axustada tamién l’Ana qu’interpretó Sara García Rodríguez, con un bon asturianu y un papel convincente nes emociones. Dambos fueron mui aplaudíos polos qu’ellí tábemos. Asina que, norabona a Telón de Fondo y siguimos esperando coses nueves, si ye que nun se fartuquen enantes.
