WILLIAM BLAKE. Un visionariu a contrapelu. La esposición de la obra visual del inglés William Blake, espónse en CaixaForum embaxo’l título de “Visiones en el arte británico”. Conocía dalgún poema d’esti autor que, la verdá, alcontraba demasiao crípticu pal mio gustu, más bien prosáicu. Lo mesmo m’asocede cola so obra pictórica que va contracorriente de les modes de la época. El gran méritu que-y alcuentro a Blake ye’l de ser a crear un mundu propiu coles sos regles personales. Un mundu mitolóxicu, colos sos dioses bonos y malos, y les sos criatures que xueguen determinaos papelos na so cosmogonía. Talo que fizo, de mou más comercial, Tolkien, Blake xuega a ser dios y a dar a lluz a una riestra de criatures, enfrentaes ente sí, col tradicional esquema del Bien escontra’l Mal. Too ello plásmalo nunos cuadros piquiñinos, la mayoría fechos a tinta y acuarela, con un marcáu calter simbólicu. Solo que a los non iniciaos, cuéstanos muncho siguir los sos planes divinos y, polo menos yo, quedamos un poco a la puerta del paraísu. De más fácil comprensión, yá que conocemos el conteníu, son les illustraciones de la Divina Comedia que fizo por encargu. Porque ellí podemos viaxar col poeta, Virgilio y la so amada, que yá son cuasi como de la familia. En resume, una esposición interesante pa conocer el mundu interior d’un artista completu (fue escritor, pintor, impresor ya illustrador), que pol so tipu de pintura y la so postura frente a la sociedá que-y tocó vivir, fue un poco “malditu” polos intelectuales de la época. Ensin embargu, col pasu del tiempu, la so obra simbolista llogró facer escuela y dexar amplia güelga del so pasu pela tierra. Llástima que poles mios carencies nun fui a aprovechala meyor.
