Títulu: «Aurora boreal» 
Autora: Asa Larsson
Torna: Pontus Sánchez Giménez, Mayte Giménez
Editorial: Seix Barral
Añu: 2009
¿Por que tán tan de moda les noveles policiales nórdiques? ¿Sedrá verdá que los llectores dexámonos llevar por modes? ¿Que somos «pastu fácil» de la mercadotecnia y que los «mass media» faen de nós, lo que quieren? ¿En qué consiste esi llamáu boom d’esti tipu de lliteratura?
Nun lo sé. Nin m’importa. Lo que pido a una bona novela ye entretenimientu, una historia bien cuntada, unos personaxes que t’enganchen y que te faigan deseyar sentate a lleer pa esfrutar d’esa llectura. Si, amás, la historia tien fondura y toca temes socialmente importantes, y si pa encima los sentimientos de los protagonistes tamién avancen xunto col desarrollu de l’anéudota, yá me presta abondo. Too eso alcuéntrolo, por exemplu, nes noveles de Stieg Larsson (¡porfa, editores, nun dicir eso de «culto», ye cursi ya innecesario) y, fuí a atopalo, tamién, nesta compatriota suya que s’apellida como el.
Aurora boreal ye una novelina entretenida, bien encardamada, con una aición que va a más, p’aselar con un final mui prestosu, nun por esperáu, menos interesante. Un crimen que paez ritual, varies iglesies cristianes d’estremaos credos que s’amiesten nuna sola, una abogada fiscal metida n’entamos criminales, una policía a puntu de dar a lluz que tien qu’investigar l’asuntu, un predicador que volvió de la muerte pa facer adeptos… Too ello, endolcao per una «aurora boreal» y unos paisaxes nevaos que nun son sólo un decoráu, sinón parte mesma de la historia. En nenguna otra parte pudieren asoceder los fechos de la mesma manera.
Un poco fartucos yá de la novela negra norteamericana, colos sos deteutives alcohólicos y perdedores, los sos políticos corruptos y les sos persecuciones de coches, esta nueva (nueva pa nós) novela nórdica, cuyu precedente ye l’inspector Wallander de Henning Mankell, vien a ser una bocalada d’aire fresco pa los que, como yo, somos aficionaos al xéneru. Otros prefieren a Kierkegaard.
