Títulu: «Roseanna»
Autores: Maj Sjöwall y Per Wahlöö
Torna: Cristina Cerezo y Martin Lewell
Editorial: RBA
Añu: 2010 (d’un orixinal de 1965)
UNA CENCIELLA NOVELA POLICIACA.- Fue un poco por casualidá. Había un pequeñu «chat» en Facebook nel que falábemos de novela policiaca y yo mencioné a Mankell y el so inspector Wallander. Más que nada poniendo l’acentu na desmitificación de la «Suecia paraísu terrenal» y los problemes de racismu, violencia y xenofobia que Mankell relata tan bien. Fue entós cuando otru participante sacó a la palestra a estos dos autores, matrimoniu, como grandes antecesores del autor d’Estocolmo. Inclusive nel so tratamientu de los mesmos problemes qu’esti denunciaba. Asina fue como m’averé a ellos -de nomes impronunciables- lleendo la so primer novela de títulu «Roseanna».
«Roseanna» ye una cenciella y entretenida novelina policiaca, pero nada nun tien que ver cola riqueza de personaxes y situaciones del mio queríu Henning Mankell. Sjöwall y Wahlöö tienen tamién a un prototípicu inspector de policía, de nome Martin Beck, qu’investiga la muerte -l’asesinatu- d’una moza norteamericana de poca chapeta, nel marcu d’un viaxe en barcu a traviés del guapu llagu Vattern en Suecia. L’argumentu ye mui llinial, y los personaxes namás s’apunten pa cumplir cola so misión de dir desfaciéndo la madexa de mou mui correutu. Un recursu que da bon xuegu ye la trescripción de los interrogatorios como si fueren recoyíos de les actes policiales, una forma mui económica de narrar y que, repito, nesti casu axustase perfeutamente.
Curiosamente, la novela ta introducida pol propiu Henning Mankell, que fala de los autores con ciñu y respetu como aniciadores del xéneru nel so país. Pero él mesmu marca les llendes temporales y sociales d’una época y otra. Nel tiempu en qu’escribieron Sjöwall y Wahlöö, años sesenta del sieglu pasáu, diz Mankell, «la sociedá sueca entá tenía más llazos col pasáu que col futuru. Les enormes foles d’inmigrantes entovía nun principiaren. Llegaben obreros pa trabayar en dalgunes grandes industries, pero non les continues avalanches de refuxaos que lleguen agora…»
Los problemes, entós, nun son los mesmos na época del matrimoniu d’escritores que na del gran Wallander. Equí, cola complexidá del fenómenu migratoriu, ye onde surden esos sentimientos de xenofobia, violencia y racismu que fienden la imaxe d’esa Suecia, un poco idílica, que teníemos el restu d’Europa. Dexemos, entós, a esta pareya de novelistes como un prestosu precedente de lo que vieno depués, pero ensin la fondura nin la capacidá de denuncia de los autores más recientes. Encabezaos, claro, por don Henning Mankell, que Dios tenga na so gloria. Na lliteraria, yá ta.
