Títulu: «Celda 211»
Autor: Francisco Pérez Gandul
Editorial: Lengua de Trapo nº 83
Añu: 2004
Rúxese muncho estos díes una película española d’esti mesmu títulu que, como amuesa del interés qu’espierta, produz el comentariu de: «Nun paez española». Ye un bon datu.
La dicha película ta basada na novela que s’asoma güei a esti blogue, y que tien por autor a esti sevillanu, periodista y escritor, que conocemos per estos barrios pues fue’l ganador del Premiu Silverio Cañada a la meyor primer novela negra, na Selmana Negra del 2004.
Nun vi la película, asina que nun soi a comparar dambes. Pero puedo dicir que tamos delantre una entretenidísima novela del xéneru «carcelariu», dura, ensin concesiones, pero exaguada tamién de sentimientos. Sentimientos primitivos, descontrolaos, que se manifiesten a güelpes y con xuramentos, pero sentimientos a fin de cuentes.
L’aniciu ta perbién dibuxáu y ye mui orixinal: Juan Oliver ta acabante de sacar un puestu como funcionariu de prisiones. El día enantes de la so incorporación preséntase na cárcel pa conocer a los sos compañeros y echar una güeyada a les instalaciones. Cuando los reclusos taben en patiu, aprovechen pa enseña-y les celdes. El calor y l’ambiente claustrofóbicu prodúcen-y un amoriu y tienen que lu echar nel camastru d’una celda, la 211. Pero nesi momentu españa un motín y los guardianes cuerren a abellugase na zona de seguridá dexándolu en camastru. LLeguen los amotinaos… Asina arranca l’aición de la novela.
Malamadre, Calzones, Releches, Tiritas, Costra, el Poeta, Tachuela, el Apache… son esos seres qu’habiten les profundidaes de la cárcel. Una cárcel que debe ser reflexu de toles cárceles del mundu, onde los valores y los sentimientos de los que tamos fuera, nun tienen un res que ver colos qu’ellí funcionen. Ellí hai otros códigos.
D’esos sentimientos, d’esos códigos y del mou en que la cárcel cambia a los homes, va esta novela de Pérez Gandul que se llee «de tirón». Historia de personaxes, rellatu de llucha sicolóxica por ver quien manda n’aquella pelligrosa pandiella de desesperaos, con un final curiosu, ún de los munchos que pudiere tener, porque cuando se ponen en funcionamientu determinaos resortes nunca nun se sabe cómo va a finar la cosa.
La novela tien, amás, l’aciertu de tener distintos puntos de vista. La primer persona ye múltiple, y asina conocemos lo que piensen caún de los personaxes, los de dientro y los de fuera. Y l’usu, en delles ocasiones, de la tercer persona llogra dar unidá a un rellatu nel que caben toos, ensin qu’haiga un «mocín» únicu, masque l’empleáu de prisiones seya’l que lleva lo importante de l’aición, compartía con un xenial Malamadre, como xefe de los amotinaos.
Les doscientes ventiún páxines del llibru devórense con gustu, nesta bona novela que nun da respiru.
