close
«Ex libris»

«Ex libris»

2010-10-08John LeCarré633Visitas

Títulu: «La canción de los misioneros»le-carre1

Autor: John LeCarré

Editorial: Areté

Traductor: Carlos Milla Soler

Añu: 2006

UN AUTOR QUE NUNCA NUN DEFRAUDA.- Con 75 años yá cumplios cuando escribió la novela, John LeCarré sigue siendo fiel al tipu escritura que-y dio fama. Un argumentu nel que s’amiesten intriga, humor, política y personaxes mui humanos, como los que podíemos atopar cualquier día na escalera de la nuestra casa. «La canción de los misioneros» nun ye una esceición.

Discipulu más o menos confesu de Graham Green, nalgunes ocasiones se-y puen ver les influyencies d’ésti cuasi a flor de piel. «El sastre de Panamá», por exemplu, ye dalgo más que deudora de «Nuestro hombre en la Habana», de Green. Anque, claro, ensin la fondura sicolóxica d’ésti. Los personaxes de Graham Green tienen munchu más mundu interior, arrecostinando, cuasi siempre, con esi sentimientu de culpa xudeo-cristianu del católicu autor de «El poder y la gloria», onde tolos actos humanos tienen, querámoslo o non, una dimensión moral.

john-lecarreLeCarré, nostante, sigue dafechamente en forma. Amuésalo nesta entretenida novela que, anque lloñe de les sos meyores obres, síguese con interés por mor de descubrir qué nueva traxedia quieren prepara-y al so queríu continente africanu. Señores de la guerra, políticos, el serviciu secretu británicu y un traductor de llingües minoritaries africanes que se ve endolcáu nuna trama que, lóxicamente, nun ye lo que paez. Too ello descrito con esa prosa aparentemente cenciella (que ye la más difícil de consiguir) y esi sentíu del humor tan inglés que fai que, inclusive los momentos más dramáticos, se llean con con un amagu de sonrisa nos llabios.

Hai que pidir que l’amigu John LeCarré, como un de los vieyos escritores de raza que mos queden, siga faciéndolo entovía munchos años más.