Títulu: «Fall River»
Autor: John Cheever
Trad.: Verónica Fdez. Camarero
Editorial: Tropo Editores
Añu: 2010
LOS COMIENZOS D’UN CLÁSICU.- Allabáu por Truman Capote y Nabokov. Amigu de Dos Passos y Cummings. Padre lliterariu (según él mesmu diz) d’Updike, Cheever ye un maestru del rellatu breve. Tien tamién escrita novela, pero ye precisamente nel cuentu onde más ye a desllumar a los llectores. Dalgunos d’ellos, de los cuentos, tán inxertos nes meyores antoloxíes de tolos tiempos.
La editorial Tropo Editores ufiértanos equí, nuna percuriada edición, una esbilla de los primeros cuentos qu’escribió l’autor, espardíos per periódicos y revistes norteamericanes. El primeru d’ellos «Ríu de seronda», datáu nel añu 1931, en plena época de la Gran Depresión del 29, y l’últimu, «La oportunidá», nel 1949, yá depués de la II Guerra Mundial. Años, pues, duros, difíciles, nos qu’una convulsa sociedá marcó a una gran xeneración d’escritores americanos.
Cheever muévese nesa sociedá col aciertu de los meyores pintores, pintándonos, non tanto a les clases más desfavorecíes, eses que nun teníen nada y abeyaben d’un llau a otru del país en cata de trabayu y comida, sinón a les clases medies. A una clas media emprobecida y decadente, que pretendía caltener el so pequeñu estatus social, llográu con munchu esfuerzu, nun mundu que s’esbarrumbaba. Pero Cheever retrata, penriba de too, al individuu. A esi ser solitariu, que vive, trabaya (cuando puede) y suaña, dende la solitú del cuartu d’un hotel o de la mesa d’un café popular, con una vida meyor.
Los cuentos de Cheever, salvo un par d’esceiciones, nun tienen final. O, polo menos, nun tienen un final escritu. Son más bien, filtrayes d’histories, cachos de la vida de dalgún ser, camín de nun sabemos onde. Ye un gran aciertu del llibru presentanos esos cuentos por orde cronolóxicu, según l’autor fue escribiéndolos, porque asina somos a ver la evolución de la so escritura, el cómo va perfeicionando l’estilu, cómo va sabiendo dar conteníu a lo que cunta. Porque los primeros cuentos son cuasi como retazos, como sensaciones, más qu’histories definíes. Y llueu, pasu ente pasu, vamos asistiendo al nacimientu del argumentu, cenciellu, y a los diálogos, curtios pero afilaos como una navaya de Taramundi. Unos diálogos nos que nun hai llugar pa esplayase, porque nun sobra nada, y que son ensuchos pero direutos, con una simplicidá enllena de poesía, n’escenarios como’l mundu de les carreres de caballos, de los bares, de los hoteles… en dalguna ocasión de los ranchos o los espacios abiertos. Tou un muestrariu d’una xente y una dómina que John Cheever enséñanos con sinceridá y, dacuando, con tenrura, que ye a quitar dalgo de la pesada carga qu’avecen a llevar los sos protagonistes.
Un llibru de cuentos, en resume, d’un clásicu de la lliteratura norteamericana que yá, nesta primer época, da amuesa del so gran valir. A mi interesóme muncho lo que cunta y cómo lo fai. Recomiéndolu encesamente.
