Títulu: La Poesía Lírica Asturiana 
Autor: Antoloxía de poetes n’asturianu y castellán
Editorial: Atenéu Obreru de Xixón
Coleición Deva nº 30
Xixón- 2008
El 18 de Febreru de 1923 cellébrase nel Teatru Xovellanos de Xixón, con gran ésitu de públicu, un actu lliterariu entamáu pola sucursal del Llano del Atenéu Obreru de Xixón, nel que participen una riestra escoyida de los meyores poetes, n’asturianu y en castellán, del momentu. Esi mesmu añu, el propiu Atenéu decide espublizar l’antoloxía de los poemes qu’ellí se lleeron, con dalgún nuevu añadíu.
85 años después, el propiu Atenéu Obreru, acabante de festexar un importante aniversariu, reedita dicha antoloxía dientro de la prestosa coleición Deva, con un mui interesante prólogu de Xosé Bolado, direutor tamién de la citada coleición. Pero al reeditar esti llibru, l’Atenéu consigue reeditar tamién, y esto ye mui importante, un espíritu de conciliación ente dos mundos que nun siempre llograron ser conciliaos: el que cinca a les dos llingües falaes n’Asturies. Asina, a traviés de les páxines d’esta antoloxía, desfilen un garapiellu de poetes que van a espresar la so voz na llingua qu’ellos escoyeron. Ente los poetes n’Asturianu tan incluyíos Acebal, Caveda, Teodoro Cuesta, Benito Canella, Acevedo y Huelves, Pepín de Pría, Marcos del Torniello, Pachín de Melás y otros. Y ente los poetes en castellán figuren Campoamor, Vital Aza, Ataulfo Friera, Alfonso Camín, Pérez de Ayala y Rosario Acuña, tamién ente otros illustres.
Precede a caún de los «bandos» una especie de «defensa de la llingua». La del asturianu a cargo de Fabriciano González (a) Fabricio, y la del castellán, del gran y escaecíu escritor José Diaz Fernández, autor de El Blocao, un de los meyores llibros sobre la guerra colonial en Marruecos, y que, anque non de nacencia, fue tamién asturianu eméritu. Y fina l’actu, y tamién el llibru, un interesantísimu discursu de don Álvaro Fernández de Miranda, Vizconde de Campogrande, home illustráu y asturianista de raigañu, nel que s’entruga por qué nun facer más actos d’enaltecimientu patriu como se faen n’otros pueblos: «…¿Asturias no vale tanto o más, quizás, que esas otras provincias, en todos sus órdenes, bajo todos sus aspectos? ¿No es, también, culta, rica y progresiva? ¿No es radiante su historia? Su personalidad ¿no se destacó siempre, a través de los tiempos, de las demás regiones españolas? ¿No tuvo usos, costumbres, lenguaje, y hasta leyes propias? Pues esto es lo que constituye su personalidad característica». A lo cual yo sólo amestaría «Amén». Un llibru que merez la pena ser mercáu y lleíu.
