Títulu: «La ofensa»
Autor: Ricardo Menéndez Salmón 
Editorial: Seix Barral – Biblioteca Breve
Añu: 2007
Con esta novela, publicada va pocu tiempu, saltó a la fama l’escritor asturianu Ricardo Menéndez Salmón (Xixón, 1971), atropando unes crítiques unánimamente favoratibles a la interesante hestoria que la mesma nos narra.
Ensin embargu, y como n’otres ocasiones tien asocedío, l’autor tien yá una sólida obra espublizada n’Asturies (relatos, noveles, teatru…) y a cargu d’editoriales asturianes (KRK, Trea), dafechamente desconocida pol fechu de ser «un escritor de provincies», y yá sabemos que lo que nun pasa en Madrid o Barcelona y recueye la prensa d’estos llugares, pues ye que nun esiste. Tuvo de ser la oportunidá d’espublizar con una editorial catalana, la qu’empuxó al xixonés hasta’l merecíu reconocimientu qu’agora tien algamáu.
En cuantes a lo que cinca a la novela decir que, pese a la rocea cola que suelo lleer eses obres tan «unánimemente» aplaudíes, nun me deceicionó n’ausoluto. O dicho d’otru mou, que me prestó abondo. Con un estilu mui cuidáu, utilizando dalgunos términos cultistes pero ensin llegar a caer no «rebuscao», y siempre al serviciu de lo que se cunta, la novela trata de la hestoria d’un rapaz normal, xastre y fíu de xastre, de familia burguesa y culta, nel rodiu de l’Alemania qu’acaba d’aniciar la Guerra. El rapaz nun ye a conciliar un mundu artísticu, musical o pictóricu, d’un país que dio grandes xenios de la cultura, colos horrores d’una Guerra qu’él tien de vivir en primera llinia de fueu. Y hai un fechu, un fechu concretu de magnitú tala que-y produz una especie de «colapsu» nerviosu, que lu dexa emocionalmente inútil pal restu la so vida.
L’autor, nesi momentu, siéntese obligáu a danos una desplicación filosófica sobre los oríxenes del mal, separtando lo que y’el cuerpu, y lo que ye l’home na so totalidá (lo que podríemos nomar l’alma o, pa nun interferir no relixoso, l’autoconciencia) y cómo l’home pue siguir viviendo al marxen del cuerpu, mutiláu física o espiritualmente.
La contraportada de la novela fala de que «…la esistencia de Kurt (el protagonista) tresformaráse nun aceleráu viaxe a los raigaños del mal…», pero en realidá nun ye asina. Nun ye, nesti casu, el típicu «descensu a los infiernos» de los «enganchaos» a la droga, al alcohol o al xuegu, que van cayendo cuesta abaxo hasta algamar esos raigaños del mal. Nesta novela, ye’l propiu mal el que se presenta delantre los güeyos de Kurt, ensin esti buscalo, nin facer nada por ello, atacándolu ensin poder defendese de mou dalgún. Una sola vez. Una sola apaición. Pero que ye abondo pa conmocionalu pal restu la so vida. Nun hai, pues, viaxe, sinón pergrande impresión.
Novela, por demás, mui entretenida de lleer y con un misteriosu final, ciertamente sorpresivu, que dexa al llector un poco ablucáu. Felicito dende equí al autor, y a so padre, Ricardo Menéndez Arias, amigu y compañeru de la Escuela de Comerciu, tamién con inquietúes lliteraries, y deséo-y munchu ésitu nes sos prósimes obres, como de xuro tendrá.
