Títulu: Mátalos suavemente
Autor: George V. Higgins
Torna: Magdalena Palmer
Editorial: Libros del Asteroide
Añu: 2012 (d’un orixinal de 1974)
«GRANUJAS DE MEDIO PELO».- Emplego esti títulu d’una película de Woody Allen porque pienso que s’axusta perfeutamente al conteníu de la novela. Un llibru que me llegó perbién recomendáu, pero que nel mio casu nun cubrió les espeutatives. Nun hai que ser mui llistu p’aldovinar que’l fechu de la publicación de Mátalos suavemente (odio la costume «canibal» de tracamundiar los títulos orixinales, l’orixinal yera Cogan’s Trade, con un claru sentíu na novela) se correspuende col estrenu de la película del mesmu desafortunáu títulu, protagonizada por Brad Pitt. Como quiera que nun vi la película, comento namás el llibru.
Trátase d’una historia curtia, sofitada principalmente en diálogos, unos diálogos que quieren ser «realistes» (y seránlo)sobre too pol emplegu constante de «tacos» y espresiones relatives al sexu. Nun quiero ser remilgáu, de xuro que ye asina como falen nos «baxos fondos» de Boston, pero a mi fiédeme un poco. Per otru llau, esos diálogos, parte principal de la novela que carez cuasi dafechu de «lliteratura», la mayoría de les veces nun son más que divagaciones que nun tienen rellación dalguna col argumentu. Por exemplu, un de los «hampones» de mediu pelo, dedícase a robar perros pa llueu vendelos con una ganancia. Pues bien, tal paez que l’autor pretende que faigamos un «master» n’asuntos perrunos, pues los dos qu’intervienen nel diálogu pásense un capítulu enteru falando de perros, que llueu nun tienen nengún interés pal argumentu. Y asina con otros temes, lo cual fai que me resulten un poco «sinsustancies».
Polo demás, la novela ye entretenida, pues ufierta «la otra cara» d’eses que describen a los grandes «capos», «padrinos» o como queramos llamalos, coles sos lluches pol poder y les sos implicaciones sociales y polítiques. Equí toos son «segundones», xente ensin importancia, que mata por encargu y llucha por sobrevivir de la meyor manera posible, tratando de nun volver al «trullo» d’onde nun fai muncho acaben de salir. Esa modestia nes intenciones y nel tratamientu de la historia ye lo que más me prestó de la novela, y tamién los pocos momentos d’aición que me paecen bien cuntaos.
Lo malo son eses allabancies que figuren nes solapes, firmaes por famosos, comparando al autor colos meyores del xéneru. «El Balzac de los bajos fondos de Boston» (!). «Merece un lugar junto a escritores de la talla de Chandler y Hammet» (!) Bueno, como dicimos perequí «al cocer, mengua». Estos diálogos, al llau de, por exemplu, los de Elmore Leonard, un maestru daveres, son de simple aficionáu. Y les aiciones de violencia, comparaes coles de James Ellroy paecen de Blancañeves. En fin, una novelina entretenida, ensin más pretensiones. Y si l’autor tenía más pretensiones, abúltame que-y quedaron nel tinteru. Nun sé qué tal sedrá la «peli», porque yá sabemos que’n Hollywood son maestros nel «retoque». Igual voi a vela pa comparar, ya vos lo diré. Por cierto, George Vincent Higgins morrió en 1999 con 60 años. Un rapaz.
