Títulu: Moo Pak
Autor: Gabriel Josipovici
Torna: Juan de Sola
Editorial: Cómplices Editorial
Añu: 2012 (d’un orixinal de 1994)
UN ESPERIMENTU INCOMPLETU.- L’autor d’esti llibru, el tal Gabriel Josipovici, atropa n’él una mecia pergrande de cultures y nacionalidaes: So madre, sefardita ñacía n’El Cairo. So padre, un rusu asquenazi ñacíu n’Odessa. La familia que s’instala en Francia y que, depués de otros caminos intermedios, fina asitiándose en Llondres. Esto sí que ye «multiculturalidá». Josipovici tien escrites, polo que diz l’editor del llibru, una docena noveles, anque ésta ye la primera que se publica n’España.
L’autor cumple con tou ésti pintorescu antecedente publicando un llibru de díficil catalogación. ¿Ye novela? ¿Ye ensayu? ¿Ye reportax? De too ello participa esta obra. Cola esculpia d’una conversación ente dos amigos qu’avecen a salir a pasiar pelos parques llondinenses, Josipovici pon en boca d’un d’ellos, el que lleva’l pesu l’alderique, una riestra d’idees al rodiu de tolos temes que podamos pensar: l’amistá, la filosofía, el procesu d’escritura, los viaxes, la política, los nacionalismos, la música clásica… afilvanaos ensin munchu orde, un poco al debalu. Jack Toledano, el personaxe que fala, cúnta-y al so amigu Damien Andersen, los avances na novela que ta escribiendo, novela que nunca ye a finar, pero que da pie pa unos ricos discutinios.
El llibru tien delles coses que siempre me molestaron: nun tien capítulos, nin siquier puntos y aparte, colo que la so llectura 1) déxate ensin fuelgu y 2) nun sabes onde aparar porque ye too un «continuum» que, al siguiente día, tienes que relleer pa garrar el filu. Depués, de les reflexones del amigu Toledano hai de too. Unes puedo compartiles, pero n’otres difiero del autor/personaxe. Nun podría dicir que nun ye un llibru orixinal ya interesante, pero la so llectura fízoseme pesada, porque amás siempre ta citando a autores como pa da-y más pesu a lo que diz: Chomsky, Becket, Swift, Homero, Elliot, Kierkegaard… En fin, como prueba val, pero que nun s’avece a facelo too asina porque nun tengo muncha gana de volver a aguantalu. La verdá ye que, pese a lo muncho que sabe Toledano/Josipovici, nun me gustaría ser el so amigu Damien.
