Títulu: «El combate melancólicu»
Autor: Ignaciu Llope
Editorial: Suburbia Ediciones
Añu: 2009
Quiero aniciar diciendo que, esti requexín del mio blogue que lleva por títulu «Ex libris», nun ye, de nenguna de les maneres, un espaciu de crítica lliteraria. Si hai dalgún suicida que sigue, morbosamente, los llibros que voi sacando, daráse cuenta nel intre. La crítica ye una cosa que tengo vedada por dellos motivos. El primeru pola mio incapacidá manifiesta pa esmenuzar un testu, analizalu, comparalu, estudialu y un llargu etcétera que necesitaría un sesudu estudiu sobre’l tema. Nin sé, nin quiero saber, pues el día qu’eso llegare perdería dafechu el placer pola llectura, como-yos ta pasando a los neños y mozos coles sos llectures escolares, que más que facelos esfrutar suponen una «tortura» que los alloña pa siempres del llibru.Yo soi un egoista de la llectura: lleo pa mí, y pal mio esfrute.
El segundu motivu pol que nun faigo crítica de llibros ye pola mio ausencia de neutralidá. Nun quiero ser neutral. En realidá pienso que naide nun ye neutral, y que toos, unos en mayor midida qu’otros, tenemos unes postures «apriorístiques» cuando nos enfrentamos a un llibru, daes pola nuestra forma de ser, la nuestra formación, los nuestros gustos, les nuestres zunes, les amistaes/enemistaes que tengamos colos autores, los intereses positivos o negativos que tengamos cola publicación de la crítica, etc. etc. Otros escuenden too esto y presumen d’ «eclécticos», d’imparciales. Yo non. Nun quiero ser imparcial y alón. Poro, nesti espaciu lo único que faigo ye comentar en voz alta el mio paecer de los llibros que, en cada momentu, toi lleendo. Y como avezo a lleer un poco abaruyadamente, pues asina salen estos comentarios personales que, en realidá pienso que son pa mí mesmu. Pa poner por escrito unes idees que se m’ocurren nel momentu y que, col tiempu, pueda volver sobre elles y recordar lo que pensé d’aquel llibru, que tampoco tien de coincidir colo que pensaría, a lo meyor, n’otru momentu. Bono, a ver si empiezo d’una vuelta.
Acabo lleer l’últimu poemariu de Nacho Llope (perdón pola confianza, pero siempre lu llamé asina) que lleva un títulu mui suxerente: «El combate melancólicu». Nacho ye un de los poetes que más me presta de la yá llarga nómina d’escritores asturianos. Evidentemente non tolos sos poemes, nin toos cola mesma intensidá. Toi falando del conxuntu. Cuando Xosé Bolado y yo preparemos la edición del llibru «Una casa tendida al oceanu», que llueu espublizamos na coleición del Atenéu Obreru Tiempu de Cristal, tuvi oportunidá de revisar rápidamente la obra del autor. Ye un escritor mui completu. Como ensayista ye profundu y amenu. Como poeta ye sensible.
«El combate meláncolicu» participa un poco de toes estes cualidaes. Una parte de los poemes pretenden (y consiguen) ser «de combate» (por xugar col títulu qu’escoyó), y otros avécense más a la «melancolía». Esto nun quier dicir, claro, que nin los de «combate» seyan panfletos, nin los de «melancolía» seyan cursis. Podía dicir que los primeros tan peñeraos de melancolía, y los segundos d’un ciertu combate.
Como exemplu de los primeros podría citar «Andreu Nin mira pasa l’augua del ríu Moskva» o la «Balada del combatiente irlandés». Como exemplu de los segundos, un perguapu «La soledá yera esto» o otru non menos guapu «Un intierru». Comente-y al autor, a la salida de la so presentación en Xixón, la mio esmolición por facer «mitos» de persones que, al mio modestu xuiciu, nun lo merecen. Como, por exemplu, a Ulrike Meinhof, culpable de la muerte de persones inocentes (anque la suya, na cárcel, fue mui «sospechosa») y a la que-y dedica un poema. Cola llectura atenta del poema debo dicir que, en nengún casu, esiste esa intencionalidá. Por último, allabar el diseñu y la edición que, como casi siempre, suelen acompañar a los llibros de Suburbia Ediciones.
En conxuntu, un mui prestosu poemariu, nel que’l mio gustu personal tira más hacia la melancolía qu’hacia el combate. Pero eso seguro que ye cosa de la edá.
