Títulu: El mundo sumergido
Autor: J. G. Ballard
Torna: Francisco Abelenda
Editorial: Minotauro
Añu: 2008, d’una edición orixinal de 1962
UNA DISTOPÍA QUE NUN YE IMPROBABLE.- Fantasía, Ciencia-Ficción, Distopía… munches maneres hai de llamar a un tipu d’histories que podíemos nomar de “catástrofes”, según ónde queramos poner l’acentu de los fechos. Quiciás la Fantasía podíemos dexala al marxe, por más que les otres, vamos llamales “categoríes” beban d’ella. Un exemplu que se m’ocurre pudiere ser “1984”, la famosa obra d’Orwell, de la qu’entovía güei sigue copiándose. Hai Ciencia-Ficción y hai Distopía, pero dambes esisten nel reinu de “lo non real”, o seya, de lo “fantástico”.
“El mundo sumergido” entra dafechu nesa mesma categoría, pero con unes posibilidaes de cumplimientu que la faen allugase ente “lo real” y “lo distópico”, o de dichu d’otru mou, trátase d’un futuru al que la humanidá ta empobinada si nun cambia la so mentalidá y los sos usos. La novela de Ballard plantega una tierra moribunda na que’l calentamientu global fizo desxelase los Polos, al tiempu qu’esapaeció’l llamáu Cinturón de Van Halen y los filtros que nos defenden de la intensidá de los rayos solares. Asina, cola mayoría de los países embaxo l’agua y unes temperatures, al mediudía, cercanes a los 50 graos y xubiendo lentamente, perviven unos grupos de persones asitiaos nos pisos altos de los rascacielos, mientres pasu ente pasu tienen que dir peregrinando hacia’l Norte, onde entovía’l calor nun ye tan apavoriante. El mundu vuelve a les condiciones del Triásicu, y plantes y animales retroceden na evolución.
Pero’l gran aciertu de Ballard vien de reducir tou esi estáu xeneral del mundu al entornu d’unes poques persones. De fechu nun llega nin a media docena. Abandónase, asina, esi planu xeneral de grandes catástrofes que tanto presta a los americanos, sobre too nel cine, pa estudiar la sicoloxía d’unos personaxes que sienten, na so vida y nos sos suaños, qu’ellos tamién tán retrocediendo hacia tiempos remotos, nuna involución qu’él estudia con detalle y fondura. Pero inclusive neses abegoses circunstancies, el ser humanu ye capaz d’escoyer, d’optar, y asina, dellos de los personaxes fáenlo pola dignidá y la xenerosidá, y otros pola ruindá y la coldicia. Esa ye la gran lleición que nos plantea la novela. Nella, importa menos l’aición que la reflexón, siempres con un “decoráu” espléndidu que ye un elementu tan importante como los seres humanos.
Ye, pues, una novela pa lleer despacio, ensin pretender buscar grandes aventures –anque tamién les hai- sinón afondar nunes persones enfrentaes a una situación estrema y cómo se planteguen el so futuru. Si ye que lu tienen y si ye que lu quieren…
J.G. Ballard, d’orixe inglés anque ñacíu en Shanghai en 1930, ye tamién autor de dos noveles que fueron llevaes al cine: “L’imperiu del sol”, de Spilberg, y “Crash” de Cronenberg. Falleció n’abril del 2009.
