TÍTULU: Operación Dulce
AUTOR: Ian McEwan
TORNA: Jaime Zulaika
EDITORIAL: Anagrama
AÑU: 2013
UNA OPERACIÓN MUI «DULCE».- Yá me proclamé, notres ocasiones, fan d’esti veteranu escritor inglés (Aldershot, 1948) autor d’una gran fiabilidá al que puedes lleer cola seguridá de que, escriba sobre lo qu’escriba, vas tener una bona historia ente manes. La última novela que lleí d’él fue Solar, y tengo de reconocer que poques veces me reí tanto como nesta historia d’un premiu Nobel de Física, coles idées yá agotaes, qu’utiliza como propia la tesis d’un de los sos alumnos que-y da un nuevu impulsu profesional y social, al tiempu que’l so matrimoniu naufraga y qu’una alumna lu persigue con puxu, ente munches otres aventures toes elles hilarantes.
En cambiu, nesta Operación Dulce, lo que nos cuenta McEwan ye una historia romántica y de ciertu suspense, onde la protagonista -personaxe estraordinariamente bien dibuxáu- entra a trabayar, pente medies d’un intelixente y estrañu amante, nel MI5, el serviciu secretu británicu onde va a pasar de ser, una escura alministrativa que copia documentos, a dirixir una operación -Operación Dulce- empobinada a contrarrestar la propaganda soviética colos intelectuales ingleses. Na memoria de toos tan los axentes dobles qu’espiaben pa los rusos.
Pero a parte del filu xeneral de la historia, y aprovechando que’l protagonista masculín ye un escritor, l’autor xuega a facer «lliteratura-dientro-la-lliteratura», inxiriendo na novela dellos cuentos curtios ya inclusive un par d’argumentos de novela, ensin qu’ello suponga nenguna distraición pa la unidá del relatu, sinón tolo contrario. Tán perfeutamente ensamblaos dientr0 de lo que se cuenta al puntu que resulten imprescindibles p’abordar les páxines finales.
Prosa elegante y con un ciertu sentíu del humor, argumentu interesante, personaxes perfeutamente dibuxaos, bastantes puntos de reflexón y dalgunos momentos románticos, faen d’esta Operación Dulce una novela que s’esfruta lléendola demostrando, una vuelta más, lo gran escritor que ye McEwan y lo muncho que nos presta seguilu.
