Lléguenme per munchos conductos les bondaes d’esta novela xuvenil, recomendada en munchos colexos como llectura obligatoria yá igualmente recomendada por críticos lliterarios, los pocos que traten esta clas de llibros que, como sabemos, nun interesen muncho al mundu lliterariu, pese a ser los que más se venden nel conxuntu les editoriales.
Teníala na llista d’espera pa poder mete-y mano en cualquier momentu, pero vime obligáu a la so llectura a petición de la mio nieta mayor, Julia, pues acababen de lleela nel cole y quería conocer la mio opinión. Lo qu’ella nun sabe ye que m’interesa más a min la so opinión que a ella la mía.
L’autor d'»Invisible» ye’l valencianu Eloy Moreno que tien una montonera de llibros vendidos en tol mundu, y tá traducíu a nun sé cuantos paises. Yo tenía lleída una novelina anterior suya, «El bolígrafo de gel verde» que, por cierto, nun me dio muncho más por ella, pero entiendo l’ésitu d’esta otra porque ta fecha a la midida los tiempos. Trata’l tema del acosu escolar, dalgo que siempre hubo, en mayor o menor grau, que nosotros siempre llamamos «los abusones» y qu’agora pónen-y un nome n’inglés pa que paeza más importante: el «bullying». Y nun fai falta que-y pongan un nome inglés porque l’asuntu tien la suficiente xixa como pa intentar esanicialu dafechu de les nuestres sociedaes, pues los efeutos que produz nel que lo sufre ye abondu. Más agora que too ta sobredimensionao col tema les redes sociales, a les que paez una obligación tar coneutaos.
Pues d’eso va la historia del señor Moreno, la so novela «Invisible», onde nos ufierta una guía completa de cómo principia lo del acosu, cómo se caltién nel tiempu y cómo pue acabar si nun sé ye a aparar a tiempu. Tamos, pues, más que delantre d’una novela, d’un llibru d’autoayuda, o meyor, d’ayuda escolar y social. Daqué pa lleer na escuela y nes families, que nos alerta y nos alienda a furar nel interior de los chavales pa deteutar a tiempu los síntomes del acosu. La cadarma del llibru facilita la so llectura por parte de los y les chavales: bona grafía, capitulinos curtios, que se dexen siempre nun momentu d’interés, y el fechu d’entamar l’argumentu pol final y dir desendolcando la madexa nel sen contrariu.
Lo que pasa ye que yo a esti tipu de llibros nun los llamo «lliteratura xuvenil», porque nun me paez que seyan lliteratura. Son, sí, llibros pa rapazos/es pero non lliteratura. Tolo que se cuenta vien yá «guionizao», persabes de lo que se fala y de cómo va acabar, fálta-y la sorpresa, l’arropu lliterariu, la novedá, la orixinalidá… tolo que requier una bona novela, seya xuvenil o adulta. Equí la cosa funciona como un tren que va per unos rieles, eso sí, con muncha soltura y velocidá, tratando d’aportar a una estación «términi» onde too quede esplicao.
¿Quiero quita-y méritu a «Invisible» con esto que digo? De xuro que non. Ye un llibru dafechamente recomendable, mui bien escritu, que te lleva en volandes mientres lu llees y que t’aporta un conocimientu del tema que, non por sabíu, ye innecesariu. Tolo contrario. Animo dende equí a lleelu, en casa y nel cole, y a facer paliques sobre elli. Asina lo ficimos la mio nieta y yo, qu’afondamos nel tema y ella fue más allá porque dixo, y ye verdá, que nun se pue poner al mesmu altor de responsabilidá a tolos que participaron (o dexaron de participar) nel asuntu. Por exemplu, profesores, tutores y direutores de los colexos tienen un mayor grau, por edá y profesión. Y porque nun puen mirar pa otru llau de dalgo que ta ocurriendo embaxo’l so maxisteriu. Y otro tanto asocede colos padres y madres, en munches ocasiones ausentes o al marxen de la vida y los intereses de los sos fíos. No que Julia y yo tuvimos d’alcuerdu ye que, con too, eso nun ye lliteratura.
