Préstame muncho como escribe la nixeriana Chimamanda Ngozi Adichie. Díxelo depués de lleer cada novela suya, principiando por “Medio sol amarillo”, na que trata un fechu tan sangrientu como’l de la Guerra de Biafra con una mecia d’horror y sentimientu, vistu dende’l puntu de vista d’una familia intelectual, de clas media-alta, nun ambiente mui asemeyáu al que podemos tener munchos de nosotros. En poco nos diferenciábemos de los personaxes ellí retrataos, pese a que’l marcu físicu y políticu yeren tan estremaos, y ellos tuvieren la piel negra y nosotros blanca. Méritu de l’autora, facete entrar nuna historia tan diferente a la tuya, pero escrita como si fuere pa ti. Pese a que “Americanah” ye la so novela más premiada, a min gustóme más “Medio sol…”, anque nun ye posible comparales.
Termino de lleer agora “La flor púrpura” y vuelvo a facer la mesma reflexon d’otres vegaes: ¡Que bien escribe Chimamanda Ngozi Adichie! Dicho lo cuál, hai qu’amestar inmediatamente qu’ésta ye la más floxa de les sos noveles, quiciás porque fue la primera qu’escribió. En “La flor púrpura” hai yá un embrión de lo que llueu van ser les siguientes noveles: la mecia de tradición y modernidá, la llucha de la relixón católica por imponese a los ritos paganos y la bruxería, les rellaciones siempre difíciles de padres y fíos, l’aniciu del primer amor, la dictadura política y les corrupteles que l’arrodien… Too ello ta equí, nesta novelina cenciella na que paez que nun pasa nada pero que ta enllena d’avisos ensin desendolcar. Unos avisos que van llevar llueu al enfrentamientu armáu de “Medio sol amarillo”, y a la fuxida en cata d’una vida más completa y meyor de “Americanah”. Asina “La flor púrpura” ye guapa de lleer por sí mesma, y tamién como preludiu de lo que va venir dempués.
Mirándolo asina, cuasi ye meyor lleer primero les otres noveles pa pescanciar que Chimamanda nun ye una novelista menor, como podría paecer al terminar esta novela, sinón que supo dosificanos un mundu complexu y pa nosotros ayenu, qu’ella tuvo la virtú de facenos cercanu nesta triloxía que seguramente ñació ensin querer selo. O sí… habría que-y lo entrugara l’autora.En cualquier casu, una llectura mui recomendable.
