Nun sé cuánto habrá nesta obrina que vimos nel Teatru Xovellanos, del testu orixinal de Vital Aza, esi escritor lenense que cultivó diversos xéneros (teatru, poesía, zarzuela, periodismu…), y que tuvo abonda sonadía na dómina en que-y tocó vivir (1851-1912). La impresión que da ye que-y la retocaron dafechu, por mor de la pluma o l’ordenador de Pepe Monteserín que l’actualizó hasta dexala poco reconocible.
Refiérome a ella como «obrina» porque, la verdá, habría que la calificar como una obra teatral mui menor, tanto nel argumentu como, inclusive, na so duración, una hora xusta. La confusión ente dos pareyes d’enamoraos, colos enquivocos qu’ello trai consigo ye una constante nos argumentos del teatru popular asturianu dende la época de don Xosé Napoleón Acebal y Morán, que fue’l primeru (Los trataos y El camberu ensin les truches) y dende esi puntu de vista, argumental, esta praviana de Madrid poco aporta.
Nun ocurre lo mesmo cola plantiya d’actores, el grupu Ververemos Teatro, que col so bon facer y arte teatral llograron que’l públicu se riera muncho, oxetivu final de cualisquier obra d’esti estilu. Cellero, nel papel de Xuanín, Beatriz Centell nel de la so fía Ramona, Antón el namoráu de Ramona («greenpeace», de nomatu), Paula Mata, siempre brillante, nel papel de Julia, Nieves Fernández nel de Purificación, mui lloca y divertida, Fernando Marrot, que tien una voz guapísima y mui teatral nel del inxenieru don Luciano, y Manu Lobo, nel papel más curtiu de Ricardo, sobrín del anterior. Toos ellos, repito, tuvieron mui perencima de la obra que fue un cenciellu divertimentu cola gracia añadía que siempre tien Monteserín. La parte n’asturianu tuvo revisada por Roberto González-Quevedo, con un llinguax axustáu que contrastaba perbién col castellán que falaben los madrileños llegaos hasta Pravia. Bueno, reímonos, lo cuál nun ye poco nestos tiempos de problemes y chanchullos. Agradecímoslo con aplausos.
