Pásame muncho con Marta Mori, siempre que lleo dalgo suyo déxame un tastu de tristura, d’emoción contenida, de frases diches a medies, como si nun fuera necesario contalo too, abrise en canal pa tresmitir una idea o un sentimientu que, namás, s’apunta. Cuando lleo poesía -non mui de siguío, soi más de novela- cuéstame muncho analizar el conteníu: Esmenuzar, xulgar, facer una crítica seria. Esfruto más colo que’l poemariu me dexa per otros sentíos que nun son los cenciellamente intelectuales. Los sensoriales, podría dicir. En cualquier casu ye fácil dexase llevar pol xuegu que l’autora entama con dalgunos de los versos qu’anicien munchos de los poemes d’esti «Los carreros del tiempu»: Gil de Biedma, Benedetti, Margarit, London… Nun sólo porque nos falen de los gustos poéticos de Marta, sinón tamién porque, dándo-yos una vuelta, encartien-y pa facelos propios, pa reescribilos con nuevos significaos. Unos significaos cuasi siempre arreyaos a los mares («De natura»), el pasu del tiempu y la soledá («De vita privata»), l’enzarru físicu y mental («De pandemia») o a les guerres y el cursu de la Historia («De mundo»), nes cuatro partes nes que se divide’l llibru.
En «Los carreros del tiempu», ta siempre presente Marta Mori, colos nuevos/vieyos temes que conformen la so poesía. Una poesía que tenemos la suerte d’esfrutar.
AUSENCIA
Marchasti.
Agora
la mar ye solo mar
y nun reflexa
los díes que pasaron.
El cursu persigo
de les hores.
Sin cuerpu,
el tiempu
ye una sombra
que t’abarca.
