Dani García de la Cuesta ye un de los mios héroes. Amiesta esa mecia que yo tanto valoro d’erudición y entretenimientu qu’enllena cualquier sitiu qu’ocupe: un conciertu, una conferencia, una mesa redonda (o cuadrada) o una cenciella charra d’amigos… Ye una de les nuestres glories, asturianes y asturianistes, que’l mundu ignora porque los señores que lleven la cultura nel nuestru país son tan ignorantes como antiasturianos. El lema yá lu sabemos: cualquier persona o cosa de fuera, ye meyor.
Esti miércoles fui al conciertu de «Villancicos y aguilandos d’Asturies», nel Antiguu Institutu, y pasélo de mieu. Yera apuesta segura. Acompañáu de voz femenina (Laura Fernández), panderu, rabil o xiblates (Sanjurjo) y vigulín, entamó un divertíu xaréu aprovisionando al personal qu’acudimos, de botelles d’anís, tarrañueles, cencerros y dellos otros intrumentos de meter ruiu, p’acompangalu nun determináu momentu de la so charra/conciertu. La xente fízolo de so, como si talamente tuviéremos pidiendo l’aguilandu per un d’esos pueblos asturianos de Dios. Cuntónos les diferencies ente villancicos y aguilandos, interpretó dambos del oriente, centru y occidente, desplicó los oríxenes y significaos de los personaxes mazcaritaos que los acompanguen y descubriónos los que tan recoyíos na catedral de Madrid, en toles llingües del estáu. Un balagar d’ellos n’Asturianu. A última hora falló la téunica y tuvi que colar ensin sentir el villancicu de 1721, arreyáu a una especie de «perlindangu» de Cuideiru. Como él dixo,
paez que tradición y téunica tan dalgo reñíes.
El llocal taba práuticamente enllenu pero, como ye davezu, nengún asturianista. Bien ye verdá que la prensa asturiana nun axuda muncho pa informar d’estos temes, pero los que enllenaron el salón d’actos del Institutu enteráronse a tiempu. Llueu un llee eso de los «eventos» n’internet, y los comentarios de la xente, y tal paez que van dir toos. Cinco mil «me gusta» y too eso de «ellí nos veremos», «suerte rapaz» y «cunta conmigo». Pero la xente nun va. Llamentablemente somos unos asturianistes de «redes sociales», siento tener que lo dicir una vuelta más. Na presentación del llibru d’Iris Diaz Trancho, «Pincelaes», pasó lo mesmo. Tamos instalaos n’automarxinación. Cuéstanos muncho dar el callu y mover el culu. Lo único que facemos, eso sí, ye dar al deu enriba’l «ratón». Tenemos lo que merecemos. Chau.
