George Simenon fue conocíu y pasó a la historia lliteraria pola creación d’un personaxe orixinal y peculiar, que surde con lluz propia al llau de tantu protagonista masuñáu y repetíu hasta la fartura d’unos escritores a otros. El comisariu Maigret dio llugar un paisanu cabal, humanu, reflesivu y que fuxe de la dicotomía «buenos-malos» pa centrase nel color gris-buxo, porque cualquier pue cometer un delitu si s’alcuentra nes condiciones afayaíces pa ello. L’autor belga tuvo una vida complexa, y dende’l so puestu como reporteru de la seición de socesos d’un periódicu, fue quien a conocer el mundu nocturnu y los personaxes que lu habiten, bohemios, prostitutes, delincuentes… Tamién-y encartió pa prauticar la escritura, dándo-y argumentos pa les más de ciento cincuenta noveles que llegó a escribir, la mayor parte d’elles yá asitiáu en París onde fixó la so residencia per un importante periodu de la vida.
Pero nun fue sólo’l comisariu Maigret, lleváu al cine en numberoses ocasiones, el motivu de los sos argumentos (llegó a protagonizar 76 noveles). Asina, llegó a firmar con más de 27 nomatos distintos una serie d’otres interesantes noveles de les más distintes condiciones. Una d’elles, ésta si firmando col nome propiu, ye la que da títulu a la entrada que tais lleendo.
«Luces rojas» ye una novelina curtia qu’atropa pa sí dellos de los temes más queridos por Simenon. Steve y Nancy formen una pareya de clas media acomodada, que viven una vida pacetible y, a lo que paez, feliz. El maríu trabaya nuna axencia de viaxes y la muyer nuna de venta de pisos. Ye’l final del branu y tienen que dir a recoyer a los sos dos fíos, neñu y neña, a un campamentu lloñe de Nueva York onde tán pasando les vaciones. Llueve y viaxen pela nueche. A lo llargo del percorríu discuten, pues Steve quier parar a tomar unes copes que necesita p’alcontrase bien. Nun ye alcohólicu pero tien «cierta» dependencia de la bebida. Nun momentu dau, el baxa del coche, entra nun bar y cuando vuelve Nancy yá nun ta. Al tiempu siéntese pela radio estatal qu’hai un presu fugáu de Sing-Sing qu’anda pela rodiada. Esti ye’l comienzu d’una historia que, cada vuelta, va algamando un mayor interés y una mayor complexidá. Y salen entós esos temes tan queridos pol autor qu’enantes comentábemos: el alcoholismu, sí, pero tamién el sentimientu de culpa, el conceutu burgués de la felicidá sofitáu nos bienes materiales, la falta de diálogu na pareya, la necesidá d’una redención pa un pecau que nun se sabe mui bien en qué consiste. El naguar por ser otra persona, alloñáu de la rutina, sintiendo la emoción de sentise llibre, al marxe de normes sociales y polítiques. Too ello va amosándose nel esfuerciu del protagonista por afayar a la so muyer, en diálogu cola xente que lu arrodia y a la que va pidiendo ayuda. Trátase, entós, d’una novela de corte policiacu pero que va muncho más alló del xéneru. N’ocasiones pue recordar al protagonista d’ «El estranxeru», de Camus, y n’otres a dalgún personaxe de Graham Green, siempre arreyáu a los sos remordimientos, a la so culpa, seya real o imaxinada. Una pequeña/ gran novela d’esi escelente escritor que ye George Simenon, que siempre nos dexa dalgún tema pa camentar. Pa da-y vueltes y reflexonar. Mui recomendable.
