Nun lu tengo na mio llista d’escritores preferíos, pero abúltame que nun ye inxusto que-y dieren al andaluz Antonio Muñoz Molina’l premiu Príncipe d’Asturies de les Lletres. Ye un escritor sólidu, comprometíu como escritor y como persona y que va llevando, dende va tiempu, tou un rosariu de premios importantes. A min préstame más como ensayista o columnista que como narrador. De fechu tengo de reconocer que, por exemplu, «El jinete polaco» nun fui a ella y terminé feneciendo ente les sos páxines. Tampoco como ensayista m’apauto con toles sos opiniones como, por poner otru exemplu, nel tema de xudíos y palestinos. Pero eso nun quita, repito, pa consideralu un escritor «de talla».
Coincidí con él nel añu 1987 nos llamaos Alcuentros de Verines, entamaos pola Universidá de Salamanca y dirixíos, naquella dómina, pol asturianu Victor García de la Concha, que llueu llegaría a presidir la RAE. El tema aquel añu yera «El cuentu», y ellí acudimos una delegación asturiana, comandada por Álvaro Ruiz de la Peña, y formada por Xuan Xosé Sánchez Vicente, Antón García, Dolfo Camilo Díaz y yo mesmu. Tamién fue J.J. Plans, pero esti arreyáu más bien a los escritores de castellán que yeren munchos. Había, pues esi yera’l motivu, representantes de les otres llingües del Estáu: catalanes (Carme Riera, Janer Manila, Roig,…),vascos (Atxaga, Mario Onaindía….) y gallegos (Suso de Toro, Carlos Casares…) Ellí, amás de les meses redondes y les lectures de los distintos cuentos (yo lleí «Un asuntu vulgar», recoyíu n»El Norte»), dábase una cierta convivencia nos salones y nes comides. Nuna d’estes últimes, tocóme na mesma mesa que Muñoz Molina (creo que taba tamién Dolfo Camilo) y salió’l tema de la lliteratura nes llingües minoritaries. Molina comentó, con tol respetu del mundu, que podía ser un inconveniente pal nuestru desarrollu como escritores el tener un «techu» más restrinxíu. Porque, dicía él, igual resulta más fácil «trunfar» nuna llingua con menos llectores, onde les editoriales publíquente con cierta facilidá, y la prensa del país recueye les tos publicaciones, que nun mercáu más ampliu, más competitivu y con mayores dificultaes. Esto último, finaba él, fai que tengas que t’esforciar a fondu y sacar lo meyor de ti mesmu, mientres nel primer casu igual t’abandones un poco al tener llegao a lo más alto con una menor dificultá.
Esta opinión orixinó, llóxicamente, un interesante alderique na mesa, onde intercambiamos los nuesos paeceres. Yo
d’aquella yera contrariu a la so opinión, pero col pasu del tiempu cada vez m’abulta que tenía más razón, y qu’igual dalgunos de los nuestros «trunfadores» quedaron a mediu camín de les sos posibilidaes. Nun sé. En cualquier casu, lo que m’importa nesti momentu nun ye tanto repitir l’alderique, como cuntar esta pequeña anécdota de Muñoz Molina cola lliteratura n’asturianu. Dicho, amás, dende un tonu de respetu pola mesma, non como’l babayu de Juanjo Millás que fizo dalgún comentariu ofensivu pala nuestra llingua, propiu d’un «chulo madrilanu» (anque nun lo seya), que provocó una gran protesta de los qu’elli tuvimos presentes. Por cierto, una de les escritores que salió na nuestra defensa fue la tristemente malograda Montserrat Roig, que-y echó una bona «repasata» al presumíu de Millás. Y esta ye la mio modesta aportación a esti premiu, que volverá a trayer a la nuestra tierra a Antonio Muñoz Molina. Hai que dicir que d’aquella nun yera tan famosu. Vamos, nun lo yera nada.
(Na semeya de la drecha, llantaos delantre la Casona de Verines en 1987, el autollamáu «Grupu Astur-Llionés» asistente a les Xornaes. Enriba, d’izquierda a drecha, J.J. Plans, Juan Pedro Aparicio, Vicente G. Oliva, Luis Mateo Díez, Antón García y Álvaro Ruiz de la Peña. Abaxo, idem, José María Merino, Xuan X. Sánchez Vicente y Dolfo Camilo Díaz)
