Tuvi esti día na presentación del poemariu de Marta Mori, «Orfandá». Fue na llibrería «La buena letra», del beneméritu Rafa, y corrió a cargu del tamién poeta Diego Solís que centró mui bien la temática del llibru. Porque ésti ye un poemariu con temática. Ye normal que cualquier poemariu tenga un tema, una constante al rodiu de la cuál enllazar l’argumentariu de los poemes, pero ocurre qu’unes veces el poeta esfruta de más llibertá qu’otres. Porque asina lo quier él, claro. Pues bien, al igual que fizo Pablo Texón con «Allumamientu», que circula y da vueltes sobre’l tema de la paternidá, nesti poemariu la escritora xixonesa encadarma los sos versos sobre lo que nos diz el títulu: la orfandá. O más concretamente, sobre l’ausencia provocada pola muerte de so padre.
Dicía l’autora na presentación del llibru que yeren importantes estos actos, sobre too tratándose de poemarios, porque nellos el poeta (la poeta) pue desplicar el significáu de determinaes claves de les qu’emplega nos sos versos. Y los asistentes, pol so llau, tamién son a entrugar aquelles partes más escures que, a lo meyor, se-yos escapen nuna llectura solitaria. En siendo esto verdá, yo creo qu’hai determinaes temátiques, determinaos sentimientos íntimos que nun se dexen desplicar. O llegues a ellos por ósmosis, por contautu de piel con piel, por reciprocidá sentimental, o nun yes quién a llegar a ellos. Da igual que te descubran les claves y que los «entiendas» racionalmente, nunca nun los sentirás como dalgo propio. Poro, anque tea mui bien asistir a les presentaciones y sentir falar al autor (autora) sobre la so propia obra, eso nunca podrá sustituyir la llectura fonda, solitaria, reflexiva que te fai saborgar el tastu del poemariu, el so interior descubiertu. Como nesti casu ye’l del dolor d’una perda.
Lo mesmo los intervinientes nel actu de la presentación, como na solapa del propiu llibru cítase, pa referise al 
poemariu, la pallabra «devastación». La devastación ante’l tema de la muerte. Ensin embargu, nun atopo yo nos poemes de Marta Mori los significaos de la pallabra devastar: desaniciar, arrasar, asolar, destruyir… Quiciás porque l’autora y, poro, la so poesía, son más bien conteníes. Como ella mesma comentaba nun quería, nin podía, dar rienda suelta al dolor, dexalu escapar como una especie de Chernóbil de sentimientos qu’ablayara al llector y lu ficiera lleer el poemariu col pañuelu na mano. Nel llugar d’esa desolación, d’esi desaniciu, yo atopo perda, ausencia, estrañamientu… y creo que sobre too resignación («…pasu ente pasu, voi despidiéndome de ti.»)
El poemariu ta dividíu en dos partes. La primera, embaxo’l títulu «Pasaxe», nun ta esaguada entovía pol arume de la muerte. Ye, como diz el títulu, una preparación, un pasaxe pa esi dolor qu’acesma na vuelta de la esquina. Hai señaldá de la infancia, del tiempu que pasó y que nun volverá… Pero bien ceo llegarán la perda y l’ausencia, nuna segunda parte titulada «El valtu». Y nun voi amestar nada más porque, como dixi enantes, nada nun puede sustituyir a la propia llectura individual, personal. O seya que comprái’l llibru y enfotáivos na so llectura. Llegaréis a la mesma conclusión a la que yo llegué: tamos delantre d’una gran poeta. Doña Marta Mori. D’ella ye la pallabra.
Como suelo facer nestos casos, póngovos el primer poema del poemariu p’animavos un poco a la llectura:
NON PLUS ULTRA
Los díes trescurríen con lentitú.
Güei
caminen
al pasu,
como los soldaos que marchen pa la guerra.
Vivimos nun espaciu acutáu,
nel corazón
de la ciudá obrera, una infancia
de xuegu y prohibiciones.
La muerte del asfaltu
ponía la frontera
al mundu conocíu:
un güertu abandonáu
y al fondu,
la firida marrón d’una caleya.
Más allá, la ciudá deteníase.
Y al final d’una cuesta
que nunca s’acababa,
llegábase a otra vida
más formosa
y ayena:
les agües d’un regatu,
ropa tendío al sol
y enfermes d’estrañeza,
les ruines
d’una carbayera.
«Orfandá»
Marta Mori
Ed. Trabe
2019
(Semeya del autor)
