close
Otru pa la llista

Otru pa la llista

2013-08-24415Visitas

Elmore LeonardFalaba l’otru día, tres el fallecimientu de Richard Matheson, que nel plazu d’un añu morriérenme dos de los mios escritores favoritos, Matheson yera’l segundu depués del gran Ray Bradbury. La llista enánchase agora cola muerte del norteamericanu Elmore Leonard, un de los grandes de la novela negra. Quiciás dalgún de los munchos llectores d’esti blogue tea agora banciando la cabeza pa los llaos y diciendo: «¡Por Dios, esos son escritores «populares», o de xéneru, y fala d’ellos comparándolos colos grandes de verdá de la lliteratura…!» Si hai dalguién que ta pensando eso, porfa, qu’abandone esti blogue porque nun ye pa él. Dalgunos de los meyores cuentos y noveles que yo lleí pertenecen a estos autores «de segundu orde», arrequexaos embaxo esi conceutu de lliteratura de xéneru, como si tola lliteratura nun fuere «de xéneru». ¿O ye que la Iliada y la Odisea nun son lliteratura de xéneru? ¿O el Quixote? ¿O Guerra y Paz?… Y ye qu’hai bonos y malos escritores, toquen el tema que toquen o el xéneru col que trabayen. Por cierto, el faltosu del periodista d’El País que recoyía la noticia de la muerte de Leonard dicía qu’él fue’l que «dignificó» el xéneru. ¿Esi paisanu nun conocía a Edgar Allan Poe, Dashiell Hammet, Raymond Chandler, Chester Himes, Ross Macdonald, Horace Mccoy, David Goodis y unos cuantos más…?  A él si que lu había que dignificar.

D’Elmore Leonard falé delles veces nestos comentarios, siempre poniéndolu como exemplu a la hora del tratamientu de los personaxes y del desarrollu de los diálogos. Pa nun repitime, copio lo que punxe, na menos que nel añu 2009, al filu de la so novela «Pronto» y con ello fáigo-y un mínimu homenaxe al veteranu autor na so reciente muerte. Descanse en paz el gran escritor de Nueva Orleans:

«Tolo contrario de la novela de Donna Leon, esta Pronto (de la pallabra italiana) ye una hestoria potente, enllena de fuercia creadora, con unos personaxes consistentes y unos diálogos rellumantes, non en vano el veteranu Elmore Leonard ye un de los meyores “dialoguistes” de la nómina actual d’escritores.
Novela que se llee d’un tirón, l’argumentu desendólcase a medies ente Italia y Estaos Xuníos, plena de “tipos duros” pero con un mui personal xacíu del honor. De la so llectura podíemos entesacar una antoloxía de frases rotundes, enllenes d’un peculiar sentíu del humor. Danos pena llegar al final (un final sele, pa una hestoria fuerte) porque prestaríanos, daveres, siguir lleéndola.

Si daquién, entovía, nun conoz a Elmore Leonard, que merque esta novela. Apuesto dalgo a que s’engancha a él.» Pues eso.