“Plizcos” ye l’últimu poemariu, por agora, d’Alfredo Garay Menéndez. Y digo “por agora”, lo cual ye una obviedá, porque paez, Alfredo, persona inspirada y trabayadora, les dos condiciones pa facer carrera na poesía. Hai el poeta inspiráu, pero vagu, que saca mui de xemes en cuando dalguna “perla”, que toos aplauden, pero que llueu duérmese “nos llaureles” (nunca meyor dicho) y nun ye a crear una obra consistente nel tiempu. Y ta tamién el trabayador, que tien munchu méritu, pero qu’igual los sos méritos lliterarios nun algamen l’altor de lo qu’elli ambicionaba. Abultame qu’Alfredo Garay va camín de les dos coses.
Esti nuevu poemariu diría que ye un pasu alantre nesa carrera que ta principiando a llabrase. “Run” y “Bichoques”, anque estremaos ente sí, guarden un ciertu paralelismu temáticu y formal, anque tamién toquen, o calúmbense nel tema del amor. Pero ye que “Plizcos” ye, más que’un poemariu d’amor, un poemariu “amatoriu”. Nun sé si nota la diferencia. Nun sólo trata sobre l’amor, sinón que “induz a amar”. Esa ye, polo menos, la mio impresión.
Y ye, amás, un amor unidireicional. Lo normal, no que cinca al amor na so vertiente lliteraria, ye que vaiga nos dos sentíos: Amor y desamor. Cuando lu tenemos/sentimos, o cuando lu perdimos o nun fuimos a algamalu. La direición única del amor qu’espeya Alfredo Garay ye nel primer de los sentíos. Alfredo posee esi amor, siéntelu y tien la necesidá de facenos partícipes d’el mesmu. Ye, pues, un amor positivu. Y el llector, polo menos yo, agradezlo. Tamos un poco fartos d’esos poetes que pasen toles fueyes del llibru dándonos la tabarra col amor que perdieron. Bueno, pues vaya por Dios, sentímoslo muncho, pero qué quies que te digamos. Por eso digo que l’amor del autor de “Plizcos” ye un amor positivu: exultante, escitante, esplícitu, eróticu. Y siempre gozosu.
Como yo soi un poco tímidu al falar de determinaos sentimientos íntimos (anque tolos sentimientos son íntimos, claro), préstenme más los poemes d’Alfredo que nun son tan esplícitos. Lo mesmo ye pola educación que me dieron naquellos años de cures y militares. Y d’ente ellos hai dos que me gusten más, anque ye difícil destacar nengún d’ente un altor notable. El primeru ye “Mirada”, que me recuerda más a esi amor nuevu, de les primeres miraes a la que ye la persona qu’escoyiste y que t’escoyó: “Anque nun digas pallabra/ cúntesmelo too/ nuna mirada./ Cuéyote una mano y entós sí,/ dícesme que nun te suelte./ Tiemblo y aprétotela un pocoñín”.
Y como contraste d’esi amor d’aniciu, ye mui prestosu tamién el tituláu “Querete”, qu’amuesa esi amor duraderu, que s’allarga a traviés del tiempu, anque vayan quedando filtrayes nel percorríu de la vida:
“Perdimos coses pel camín/ pero guardamos el ciñu y la llealtá./ Como te digo/ queden coses,/ ensin más: Nun soi quien en dengún momentu/ a quítate de la cabeza.”
En resume, un perguapu poemariu que supón, al mio modestu talantar, un reblagu importante na carrera poética d’Alfredo Garay. Una carrera que, de xuro, nun fizo más qu’entamar.
P.S. Hai un Prólogu y un Epílogu mui prestosos de la escritora Pilar Sánchez Vicente. Ella cuenta meyor que yo lo que ye’l poemariu.
