Hai llibros que xunten de forma maraviosa les dos partes que los componen: el continente y el conteníu. Esto pasa dacuando con dalgunos llibros p’adultos, que te presta lleelos porque, al marxe de lo que te cuenten, tienen un formatu y una edición afayaíces, pero sobre too asocede colos llibros pa neños onde hai verdaderes xoyes publicaes. Ye igual que cuando dicimos d’una sidra que “fai vasu” que seguro que los foriatos nun lo entienden, pero cualquier asturianu avezáu a la nuestra bebida nacional sabe de lo que falamos. Del mesmu mou, digo yo, hai publicaciones que “faen llibru”. Que son la mecia perfeuta del interior, de lo que cuenten, y del esterior lo que-yos da forma y envoltoriu. Un d’eses publicaciones que “faen llibru” ye esti “Poemas en la pista” d’Angel Fernández y Ester Sánchez.
Yá la editorial Pintar-Pintar nos tien avezaos a unes ediciones peguapes, envidia de cualquier otra asitiada fuera d’Asturies, motivu pol cuál ganó en más d’una ocasión el Premiu Nacional d’Edición, pero ye qu’estos poemes al rodiu del mundu del circu son un llibru pa engalanar la biblioteca. Asina, a unos poemes cenciellos, entrañables, señaldosos… como son los d’Ángel Fernández, amiéstense unos estraordinarios dibuxos d’Ester Sánchez que merecen enmarcase y distribuyise per tola casa pa enguapecela. Plenos de color y maxa, de frescura ya imaxinacion paezme que son de los más guapos que vi de l’autora asturiana. La suma de los dos fautores –testu ya ilustración- engrandez el productu dexando’l llistón mui altu pa tolo que venga depués. Norabona a los autores y a la editorial por esti guapísimu llibru que ye un regalu obligáu pa cualquier neñu o neña que lo mereza. O seya, pa toos.
MAGIA
-De este sombrero yo saco
una paloma, un canario,
una estrella de ocho puntas,
y hasta un conejito azul.
¿Lo quieres intentar tú?
El niño mete la mano
en el sombrero de copa
y tira de unas orejas
que se ha encontrado en el fondo.
Y saca al mago que ahora
tiene cara de conejo.
-Pero niño ¿tú que has hecho?
Y el niño dice contento:
-Magia, supongo.
